Ўзбекистонда фарзандликка олиши мумкин бўлган шахслар рўйхати ўзгартирилади

Ўзбекистон 12:32 / 12.01.2021 9574

Вазирлар Маҳкамасининг “Етим болалар ва ота-онасининг ёки бошқа қонуний вакилларининг қарамоғидан маҳрум бўлган болаларнинг ижтимоий ҳимоясини янада кучайтириш чора-тадбирлари тўғрисида” 2019 йил 21 ноябрдаги 739-сон қарорига ўзгартириш киритиш ҳақида”ги қарори лойиҳаси эълон қилинди.

Қайд этилишича, амалдаги қонунчиликка кўра, қасддан содир этган жиноятлари учун илгари ҳукм қилинган шахслар вояга етмаганни фарзандликка олишларига йўл қўйилмайди.

Мазкур норма ижтимоий аҳамияти катта бўлмаган, унча оғир бўлмаган ҳамда фарзандликка олишга тўсқинлик қилмайдиган жиноят турлари (иқтисодиёт, экология соҳасидаги жиноятлар ва ҳ.к.) учун ҳам татбиқ қилинади.

“Амалдаги тартиб муқаддам қасддан жиноят содир этган шахслар томонидан ноқонуний йўллар билан фарзанд асраб олинишга олиб келиши эҳтимолдан холи эмас.

Фарзандли бўлиш ҳар бир инсоннинг ҳуқуқидир. Таҳлиллар республикада фарзандликка олиш истагини билдирган шахслар 4 мингдан ортиқ эканлигини кўрсатмоқда.

Бугунги кунда фарзандликка олиш истагида навбатда турганларнинг сони фарзандликка берилаётганларга (ҳар йили ўртача 200 нафар бола) нисбатан анча юқорилигича қолмоқда”, - дейилади ҳужжатда.

Қарор лойиҳаси билан муқаддам қасддан жиноят содир этган шахслар томонидан фарзандликка олишни тақиқлаш тизимини ижтимоий хавфлилигига қараб белгилаш мақсадида Вояга етмаган болаларни фарзандликка ва болаларни оилага тарбияга олиш (патронат) тўғрисидаги низомнинг (Вазирлар Маҳкамасининг 21.11.2020 йилдаги 739-сон қарорига 4-илова) 9-банди олтинчи хатбошисини “шахсга, тинчлик ва хавфсизликка, жамоат хавфсизлиги ва жамоат тартибига қарши оғир ва ўта оғир жиноятларни қасддан содир этганлик учун илгари ҳукм қилинганлар” таҳририда баён этиш кўзда тутилмоқда.

Қарорнинг қабул қилиниши бола ҳуқуқларининг ҳимоя қилинишини тўлақонли таъминлаш, улар ўртасида турли ғайриижтимоий хатти-ҳаракатлар содир этилишининг барвақт олдини олиш ҳамда болаларни қонунга зид равишда фарзандликка олиш ҳолатларига барҳам беришга кўмаклашиши айтилади.

Лойиҳани ишлаб чиқиш жараёнида Россия, Беларусь, Украина, Озарбойжон, Қозоғистон каби хорижий давлатлар амалиёти ўрганилгани, АҚШ, Руминия, Хитой, Франция, Канада, Германия, Норвегия, Дания, Голландия, Исроил, Нидерланды, Жанубий Америка, Испания, Буюк Британия каби хорижий давлатларда фарзандликка олишни тақиқловчи талаб сифатида шахснинг муқаддам судланганлиги умуман кўзда тутилмагани билдирилган.

Кўпроқ янгиликлар