Ўзбекистон бўйлаб бешта йўналишда авиақатновлар йўлга қўйилади — молия вазири ўринбосари

Ўзбекистон 15:13 / 12.01.2021 21054

Водий вилоятларини Ўзбекистоннинг асосий туристик йўналишлари – Самарқанд, Бухоро, Урганч, Термиз билан боғловчи бешта йўналишда авиақатновлар йўлга қўйилади. Бу ҳақда 11 январ куни AОКAда бўлиб ўтган матбуот анжуманида Молия вазири ўринбосари Aҳадбек Ҳайдаров маълум қилди. 

«Транспорт вазирлиги ва Туризмни ривожлантириш давлат қўмитаси билан ҳамкорликда дастлабки бешта йўналишни аниқладик. Бу йўналишлар водий вилоятларини Самарқанд, Бухоро, Урганч, Термиз каби асосий туристик шаҳарлар билан боғлаши кутилмоқда. Масалан, Фарғона-Бухоро йўналишида авиақатнов йўқ. Ҳисоб-китобларимизга кўра, агар Фарғона-Бухоро йўналишига рейс қўйсак, харажатларнинг 30 фоизи бюджетдан қоплаб берилади. Шу йўналишда парвоз қилувчи йўловчилар учун бу вақтни иқтисод қилиш ва хавфсизлик нуқтайи назаридан қулай бўлади. Лойиҳа тўлиқ ишлаб чиқилиб, ҳукумат томонидан маъқулланганидан сўнг, қарор сифатида қабул қилинади ва жорий қилинади», – деди вазир ўринбосари.

Аҳадбек Ҳайдаровнинг айтишича, чипталарнинг тахминан 30 фоизи давлат бюжетидан қоплаб берилиши – субсидия тўғридан тўғри авиакомпанияга берилиши назарда тутилмоқда.

«Субсидияларни ажратиш борасида давлат бюджетидан маблағ ажратиш имкониятимиз етарли. Тахминий ҳисоб-китобларга кўра, бешта йўналиш бўйича субсидия жорий этиладиган бўлса, бир йиллик ажратиладиган маблағ 20-25 миллиард сўмни ташкил этади»,дейди у.

Аввалроқ, АОКАда ўтган матбуот анжуманида  Туризмни ривожлантириш давлат қўмитаси раиси Азиз Абдуҳакимов 2020 йилда 1 миллион 800 минг нафар маҳаллий турист сафари ташкил этилганини, 2021 йилда буни кескин ошириш, сайёҳлар сонини 7,5 миллионга етказиш режалаштирилганини айтиб ўтганди.

2021 йилда Андижон ва Хивани тўғридан тўғри боғловчи темир йўл рейси, Фарғона ва Урганч авиарейси, Қаршидан Урганчга темир йўл ҳамда авиарейслар йўлга қўйилиши режалаштирилмоқда.

Кўпроқ янгиликлар