Навоийда «Бермуд учбурчаги» 60 хонадонли уйни «ямламоқчи». Вилоят ҳокимлиги муаммога ечим топа оладими?

Жамият 18:03 / 12.01.2021 22533

Бу можароли турар жой ҳақида дастлаб 2018 йилда репортаж тайёрланган эди. 2020 йилнинг август ойида мавзу иккинчи бор ёритилди. Шундан сўнг шаҳар ҳокимлиги муносабат билдириб, харидорларга хонадонлари ҳужжатлаштириб берилиши чоралари кўрилишини маълум қилганди. Аммо ушбу ваъда ҳамон бажарилмади.

Сарлавҳада бежиз ушбу масала Бермуд учбурчагига қиёсланмади. Мазкур можаронинг уч томони бор.

Биринчи томони — «Навоий қурувчи ёшлари» МЧЖ (раҳбари Феруз Тўхтаев) 2016 йили аҳолидан пул йиғиб (эвазига одамлар билан келишув битими тузилади ва нотариус орқали имзоланган кафолат хати берилади), ўша пуллар ва банк кредити ҳисобига бир ва икки хонали квартиралардан иборат турар жой барпо этишга киришади. Турар жой биносининг пойдевор қисми битганда уни гаровга қўйиб, «Халқ банки»дан кредит олади.

MPqDN0Dk8fGMn3SmPEmek1Mg6Gjh77zc.jpg (800×505)

Иккинчи томони, АТ «Халқ банки» Кармана Амалиёт бўлими бўлиб, банк томонидан «Навоий қурувчи ёшлари» МЧЖга 2016 йил 15 декабрда 1,5 йил муддатга йиллик 16 фоиз устама тўлаш шарти билан 410 млн сўм кредит маблағи ажратилган. Аммо «Навоий қурувчи ёшлари» МЧЖ кредит шартномасининг тегишли бандини бузган ва ўз мажбуриятларини доимий равишда бажармай келган. Оқибатда банк томонидан 2017 йил 23 июнда фуқаролик ишлари бўйича Навбаҳор туманлараро судига даъво аризаси киритилиб, кредит шартномасини муддатидан олдин бекор қилиш, кредит қарздорлигини ундириш, ундирувни гаров мулкларига қаратиш сўралган. Шу тариқа, суд қарори билан қурилаётган 5 қаватли турар жой биноси кимошди электрон аукцион савдосига қўйилган.

Учинчи томон, кимошди электрон аукцион савдосида мазкур уйни сотиб олган бухоролик тадбиркор ҳисобланади. У сотиб олган вақтда «дом»нинг тўртинчи қавати тикланаётганди. Бино қурилишига улар ҳам ҳисса қўшишади, бироқ уйлар учун тўлов қилган аҳоли вакилларига рад жавоби беришади. Аслини олганда, улар ҳам уйга харажат қилишган ва ҳозирда харажатлари қопланишини сўраб, тегишли органларга мурожаат этишган.

Шу тариқа, аҳолининг пули эвазига бир қурувчи томонидан қурилиб бошланган ва тўртинчи қаватга келганда аукцион орқали иккинчи тадбиркор томонидан сотиб олинган турар жойдан хонадон сотиб олган аҳоли мана уч йилдирки ўз уйларида бегона.

0YhCCgF6LVAwPGqH15-4Il9m-iaFoZMw.jpg (800×505)

Хавотири кун сайин ошиб бораётган хонадон эгалари 4 январ куни яна Навоий шаҳри ҳокимлигида тўпланишди. Улар билан шаҳар ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Бобур Қодиров суҳбатлашди.

«Илтимос, ёрдам беринглар, уйимизни кадастр қилиб олайлик. 3 нафар фарзандим бор. Квартирада яшаб келяпман. Мана, ҳозир котёлни ҳам ўзимиз қиляпмиз. Ҳар битта оила 10 миллион сўмдан яна харажат қилди. Шартномага кўра, қурилиш фирмаси котёл ўрнатиб бериши керак эди. Шунга ҳам розимиз. Ҳеч бўлмаса уйимизни қонунийлаштириб олайлик. Давлат идораларига борсак, у ёқдан бу ёққа сарсон қилишмоқда», — дейди хонадон эгаларидан бири Лайло Убайдуллаева.

Eji-s-101Z3_db9ant7E9VYhPVsMOHrg.jpg (800×505)

«Бизнинг уйимизни Феруз Тўхтаев қурган. Уйнинг муаммолари ҳеч тугамаяпти. Бизларга котёл ўрнатиб бераман деди, аммо ўрнатиб бермади. Майли, уни ҳам ҳамма ўзи ўрнатяпти. Фақатгина бизга кадастр қилиб берсин. Ўзимизнинг пулимизга олган уйимизга ўзимиз эгалик қилайлик. Қаерга борсак суднинг қарори унақа, бошқаси бунақа деб айтишади. Яна кимдир даъвогар бўлиб чиқади. Ўз пулимизга олган уйга ким даъвогар бўлиши мумкин?!» — дея ёзғиради хонадон сотиб олган яна бир фуқаро Азиза Ўткирова.

Гарчи ҳоким ўринбосари суҳбат жараёнида аҳолидан уйни ҳеч ким тортиб ололмаслигини қайта-қайта такрорлаган бўлса ҳам, масаланинг ечими хусусида аниқ гап ва вақтни айта олмади.

Бобур Қодировнинг Kun.uz’га берган интервьюси эса қисқача шундай бўлди:  «Бу фуқароларнинг мурожаати ҳозирги кунда ҳуқуқни муҳофаза қилувчи органлар томонидан тегишли тартибда ўрганиб чиқилмоқда ва ушбу масала қонуний тартибда тез кунларда ўз ечимини топади».

Kun.uz мазкур масала юзасидан Навоий вилояти адлия бошқармасининг инсон ҳуқуқларини ҳимоя қилиш бўлими бошлиғи Даврон Ҳусанов билан ҳам суҳбатлашди.

«Адлия бошқармасига фуқаролар Шомуродова ва Ҳомидов мурожаат қилишган. Улар ўзларига тегишли уйнинг тақиқда эканлиги, амалда сотиб олган бўлсалар ҳам расмийлаштириб ололмаётганлигини маълум қилиб, амалий ёрдам сўрашган.

Вазият ўрганиб чиқилганида аниқландики, «Навоий қурувчи ёшлари» МЧЖ томонидан Навоий шаҳрида биттаси 60та, иккинчиси 48та хонадондан иборат кўп қаватли уйлар қурилган. Мазкур уй-жойлар бугунги кунда Навоий шаҳар МИБ томонидан тақиққа олинганлиги маълум бўлди. Тақиққа олинишига эса «Навоий қурувчи ёшлари» МЧЖнинг солиқдан, бошқа тадбиркорлик субъектидан, иссиқлик энергияси ва банкдан қарздорлиги сабаб бўлган.

Натижада уй-жойни фуқаролар номига расмийлаштириб бериш имкони бўлмаган. Мазкур масалада куни кеча ушбу уйда яшовчи фуқаролар адлия бошқармасида қабул қилинди. Вазият юзасидан ўрганиш ишлари олиб борилмоқда. Шунингдек, мазкур уйни қуришда иштирок этган бухоролик тадбиркорнинг ҳам мурожаати қабул қилиб олинган. Бу мурожаат ҳам ҳозирги кунда ўрганиб чиқилмоқда. Ўрганишлар якунига етгач, натижаси юзасидан батафсил ахборот берсак бўлади», — дея маълум қилди Даврон Ҳусанов.

Уйларини кадастр қила олмаётган аҳоли 4 январ куни Навоий вилояти прокуратурасига ҳам боришган ва вилоят прокурори Бахтиёр Ахмедов номига уйларни ўзларининг номига расмийлаштириб беришни ҳамда судга даъво аризаси киритишни сўраб мурожаат қолдиришган. Ҳозирда уларнинг ягона умиди вилоят прокуратурасидан бўлиб турибди.

си2.jpg (1113×621)

Хуллас, 3 йилдан буён коптокдек у ёқдан бу ёққа тепилаётган мазкур масалага вилоят ҳокимлиги аралашиши ва ечим топиши зарур. Йўқса, «Бермуд учбурчаги» 60та хонадонли кўп қаватли уйни «ютиб юбориши» ва пешона тери эвазига пул топиб, уй сотиб олган фуқаролар кўчада қолиши ҳеч гап эмас.

Руслан Сабуров, Kun.uz мухбири.

Кўпроқ янгиликлар