Qora quti Shimoliy Jakarta portiga yetkazilgan va jurnalistlarga namoyish qilingan. Suratlarda ichi yarmigacha suv bilan to‘lgan shaffof idish va uning ichida joylashgan qora qutini ko‘rish mumkin.

Quti aviahalokatning tergovini olib borayotgan Transportdagi xavfsizlik milliy qo‘mitasiga topshiriladi. 

Avvalroq qidiruv guruhlari samolyot qulagan joyda bortyozgichning radiomayog‘i signalini ushlashga muvaffaq bo‘lishgandi. So‘ngra dengiz tubida qutining o‘zi topilgan. 

Indoneziya poytaxti Jakartadan Pontianakka reys bajargan samolyot havoga ko‘tarilgandan ko‘p o‘tmay radarlar ekranidan g‘oyib bo‘lgandi. Keyinroq samolyot Yava dengiziga qulagani ma'lum qilingan.

Samolyotda 62 kishi, jumladan ekipajning 10 a'zosi bo‘lgan. Ularning barchasi halok bo‘lgan. Qutqaruvchilar samolyot bo‘laklari, qurbonlarning jasadlari va shaxsiy buyumlarini aniqlashgan.