“Мен давлат котиби Помпеони Неомдаги аэропортда кутиб олдим ва кузатиб қўйдим ва унинг валиаҳд шаҳзода билан учрашувида ҳам бўлдим. У ерда исроилликлар бўлмади”, деб айтган Саудия Арабистони ташқи ишлар вазири.  

У твиттердаги саҳифасида ОАВда маълум қилинган учрашув бўлмагани, музокаралар эса Саудия Арабистони ва АҚШ вакиллари ўртасида борганини маълум қилган. 

Аввалроқ Axios ахборот портали Исроилдаги манбаларга таяниб, валиаҳд шаҳзоданинг Нетаняху ва Помпео билан музокаралар ўтказгани, учрашувда Моссад директори Йосси Коэн ҳам иштирок этганини маълум қилган. Нетаняху офисида бу маълумотлар на тасдиқланган, на рад этилган. 

22 ноябрда Нетаняху офисида вазирлар маҳкамасининг ҳар ҳафталик мажлиси унга кўпроқ тайёргарлик кераклиги важи остида қолдирилган. Бироқ манбаларнинг таъкидлашича, мажлиснинг қолдирилишига асл сабаб Нетаняхунинг Саудия Арабистонига ташрифи ҳисобланади.     

Айни вақтда Исроил ва Саудия Арабистони ўртасида расмий дипломатик муносабатлар мавжуд эмас. Axios’нинг таъкидлашича, икки давлат раҳбарияти ўртасида анчадан бери де-факто ўзаро алоқалар йўлга қўйилган, бироқ улар сир тутиб келинган. Юқорида гап бораётган учрашув эса икки давлат ўртасида бундай юқори даражада ўтган биринчи учрашув ҳисобланади. Нашрда маълум қилинишича, Исроил ва Саудия Арабистони АҚШ президент сайловларида ғалаба қозонгани эълон қилинган Жо Байденнинг Эрон билан ядро келишуви тузиш борасидаги режаларидан хавотирланмоқда.