«Ўзсаноатқурилишматериаллари» уюшмаси томонидан газобетон ишлаб чиқариш бўйича бир қатор инвестиция лойиҳалари амалга оширилмоқда, деб хабар берди уюшма матбуот хизмати.

Уюшма масъуллигида 2019 йилда автоклав газобетон ишлаб чиқаришга ихтисослашган йиллик қуввати 550 минг метр куб бўлган 4та корхона фаолияти йўлга қўйилган. 

Жорий йилда «Ўзсаноатқурилишматериаллари» уюшмаси вилоят ҳокимликлари билан ҳамкорлигида ушбу йўналиш бўйича 7та инвестиция лойиҳаси амалга оширилади. Автоклав газобетон ишлаб чиқарувчи энг йирик корхоналар Тошкент вилоятида ишга туширилиши режалаштирилган. 

Навоий, Қашқадарё ва Сирдарё вилоятларида ҳам мазкур йўналишда 3та лойиҳани амалга ошириш ишлари жадал суръатларда олиб бориляпти. Айни дамда ушбу корхоналарга ускуналар ва мутахассисларни олиб келиш ишлари амалга оширилмоқда. Шу билан бирга, бино ва иншоотларни қуриш ишлари давом этмоқда.

Газобетон – ғовак (тешик-тешик) бетоннинг бир тури бўлиб, замонавий қурилиш материали. Уни баъзан «сунъий тош» деб ҳам аташади. Оддий бетондан фарқи – таркибида 1-3 миллиметрли пуфаклар мавжуд бўлиб, улар туфайли бетон енгил, етарли даражада мустаҳкам, иссиқ ва совуқдан яхши ҳимоялаш хусусиятларига эга бўлади. Шунингдек, табиий газни 8 марта кам сарфлаши, энергия тежамкорлиги ва энг асосийси, унумдор тупроқнинг ишлатилмаслиги билан пишиқ ғиштдан бир неча маротаба афзаллиги билан ажралиб туради.1 метр куб метр ғишт 1800-2000 кг оғирликка эга бўлса, шу ҳажмдаги газобетоннинг оғирлиги атиги 500-700 кг.ни ташкил этади.