Тиббий профилактика ишлари самарадорлиги оширилади

Ўзбекистон 12:01 / 21.11.2020 1877

Ҳужжат билан тиббий профилактика ишларининг асосий йўналишлари белгиланди, деб ёзади Norma.

2021 йил 1 январдан бошлаб 40 ва ундан юқори ёшдаги фуқароларда юрак қон-томир хавфини (гипертония, инфаркт, инсульт, қандли диабет ва бошқа хавф омилларини) аниқлаш бўйича тизимли равишда скрининг текширувлари ўтказилади.
 
Аҳолининг соғлом турмуш тарзини қўллаб-қувватлаш ва жисмоний фаоллигини ошириш марказининг туман (шаҳар) бўлимлари кўп тармоқли марказий поликлиникалари биноларида жойлашишга рухсат берилади. Уларнинг ходимлари томонидан амалга оширилаётган тарғибот-ташвиқот ишлари билан бир қаторда фуқароларга тиббий-профилактик хизматлар (маслаҳатлар, кўриклар ва бошқалар) кўрсатиб борилади.
 
Маҳаллаларда, мактабгача таълим ташкилотлари, умумтаълим мактаблари ва олий ҳамда ўрта махсус таълим муассасаларида соғлом турмуш тарзини шакллантиришга кўмаклашувчи волонтёрлар (шу жумладан нафақадаги шифокорлар, ўқитувчилар, зиёлилар ва бошқалар) жамиятлари ташкил қилинади.
 
Вазирлар Маҳкамаси ҳузурида Касалликлар профилактикаси ва жамоат саломатлиги масалалари бўйича Мувофиқлаштирувчи комиссия ташкил қилинди ҳамда унинг вазифалари белгиланди. Унинг таркиби ва фаолиятини ташкил этиш тартиби тасдиқланди, шунингдек соҳа бўйича вазирлик ва идораларнинг республика, вилоят ва туман даражасидаги вазифалари тақсимланди. Соғлиқни сақлаш вазирлиги Мувофиқлаштирувчи комиссиянинг ишчи органи ҳисобланади. Мувофиқлаштирувчи комиссиянинг қабул қилган қарорлари давлат ва хўжалик бошқаруви органлари, маҳаллий ижро ҳокимияти органлари ва бошқа ташкилотлар учун бажарилиши мажбурийдир.
 
Ҳужжат 13.11.2020 йилдан кучга кирди.

Кўпроқ янгиликлар