Xalq ta'limi vaziri Sherzod Shermatov ta'lim sohasidagi islohotlar o‘z natijasini berishi uchun vaqt talab etilishi haqida gapirdi. 

«Ilgari bayram tadbiri bo‘lsa, «Turkiston» saroyida o‘tkazilardi. Aksariyat o‘qituvchilarimiz esa paxta dalasida bo‘lardi. Bu yil o‘ziga xos juda katta tadbir o‘tkazildi va bu tadbirda prezidentimizning o‘zi chiqib, katta dasturiy islohotlarni belgilab berdi.

Ta'lim sohasi shunday sohaki, undagi islohotlar o‘z mevasini juda ko‘p vaqtdan keyin beradi. Ko‘chalarda savodsiz yozuv, reklamalarni ko‘rganimizda «mana, ta'lim yomon», deb gapiramiz. Aslida, bu yillar davomidagi ishlar oqibati: o‘qituvchilar ko‘cha supurgan, paxta tergan, o‘qituvchini hammaga xizmat qiladigan darajaga tushirib qo‘ygan edik. 

Oxirgi yillarda davlat rahbarining siyosiy irodasi tufayli o‘qituvchilar obro‘sini ko‘tarish bo‘yicha keng ko‘lamli ishlar boshlandi», – deya Sherzod Shermatovning so‘zlarini keltirmoqda Kun.uz muxbiri.