Hafta o‘rtasidagi yevrokubok startidan keyin shanba va yakshanba kunlari kuchli beshlik toifasiga kiruvchi chempionatlarda tur o‘yinlari o‘tkaziladi. Kelayotgan haftada ham yevrokubok bahslari o‘tkazilishi sababli top-klublar ishtirokidagi asosiy o‘yinlar shanba kuniga belgilangan. Ispaniyada mavsumning eng asosiy to‘qnashuvi - «El-Klasiko» kuzatilsa, Angliyada «Manchester Yunayted» - «Chelsi», Italiyada esa «Milan» - «Roma» va barcha o‘zbekistonlik muxlislar kutayotgan «Jyenoa» - «Inter» qarama-qarshiliklari o‘rin olgan.
Angliya Premer-ligasi: «MYu» - «Chelsi», «Arsenal» - «Lester»ga qarshi
Tumanli Albionda uik-endning markaziy uchrashuvi «Old Trafford» stadionida o‘tkaziladi. Mavsum startidagi omadsizlikdan keyin Nyukasl va Parijdagi muhim g‘alabalar evaziga tobora o‘ziga kelayotgan «Manchester Yunayted», millionlar sarflangan transferlarga qaramay g‘alabali yo‘lni topolmayotgan «Chelsi»ni qabul qiladi. Joriy mavsumda o‘tkazilgan jami 8 o‘yindan bor yo‘g‘i 2tasida raqibidan ustun kelgan «Chelsi»ning «Old Trafford»dagi muvaffaqiyatiga ham 7 yil bo‘ldi - «aristokratlar» so‘nggi marta 2013 yilda «Orzular teatri»dan g‘alaba bilan qaytishgan. «Yunayted» «Chelsi»ga qarshi oxirgi bahslarda ustunlikka ega bo‘lib turibdi. Shunga qaramay, jamoalarning hozirgi holatidan kelib chiqib, kimnidir ustunligini taxmin qilish qiyin. Sulsher Harri Maguayr, Edinson Kavani, Meyson Grinvud safga qaytganini aytgan bo‘lsa-da, ularning maydonga tushishi so‘roq ostida qolmoqda. Qolaversa, Marsiyal ham diskvalifikatsiyasi bois «Chelsi»ga qarshi o‘yinni o‘tkazib yuboradi. Londonliklar safida esa Kepaning yelkasidan jarohat olganini aytmasa, Lempard tarkib borasida muammoga ega emas. Turnir jadvalidagi holatdan kelib chiqilsa, 3 ochko ikki tomon uchun ham juda muhim.
«MYu» - «Chelsi». So‘nggi 5 o‘yin (APL):
17.02.2020. Chelsi – MYu – 0:2
11.08.2019. MYu – Chelsi – 4:0
20.10.2018. Chelsi – MYu – 2:2
25.02.2018. MYu – Chelsi – 2:1
05.11.2017. Chelsi – MYu – 1:0.
Juma kuni «Aston Villa» 1-o‘ringa chiqib olish imkoniyatini yo‘qotdi. 2-o‘rinda borayotgan Birmingem klubi o‘z uyida «Lids»ga yirik hisobda mag‘lub bo‘ldi (0:3). Shanba kungi o‘yinlar shiddatli o‘tishi kutilayotgan «Vest Hem» - «Manchester Siti» bahsi bilan boshlansa, «Liverpul» – «Sheffild» uchrashuvi bilan tugaydi. Yakshanba kungi markaziy bahs Londonda «Arsenal» va «Lester» o‘rtasida kechadi. Turnir jadvalida bir xil 9 ochkodan to‘plab, 4-5-o‘rinlarda borayotgan jamoalar o‘yinidagi g‘olib jamoa raqibidan o‘zib ketish imkoniyatiga ega bo‘ladi. Peshqadam «Everton» safarda «chaqilmas yong‘oq» bo‘lmish «Sauthempton»ga qarshi saf tortadi.
APL. 6-tur
23 oktabr (juma)
00:00. Aston Villa – Lids – 0:3.
24 oktabr (shanba)
16:30. Vest Xem - Manchester Siti
19:00. Fulhem - Kristal Pelas
21:30. Manchester Yunayted – Chelsi
00:00. Liverpul – Sheffild
25 oktabr (yakshanba)
19:00. Sauthempton – Everton
21:30. Vulverhempton – Nyukasl
00:15. Arsenal – Lester
26 oktabr (dushanba)
22:30. Brayton - Vest Bromvich
01:00. Bernli – Tottenhem
La Liga: Alamzadalar «El-Klasiko»si
Futbol ixlosmandi bo‘lmaganlar ham intiqlik bilan kutadigan «El-Klasiko» odatdagidek dunyoni ikki tomonga bo‘lib qo‘yadi. Shanba kuni barchaning nigohi «Kamp Nou»dagi qarama-qarshilik tomon qaratiladi. La Liganing mavsumdagi eng asosiy o‘yinida ikki alamzadalar - «Barselona» va «Real» o‘zaro to‘qnashadi. Ikki tomon ham chempionatdagi oxirgi o‘yinida sensatsion tarzda mag‘lubiyatga uchragani o‘yinning darajasiga ta'sir qila olmaydi. Aksincha, Chempionlar ligasida «Ferensvarosh»ga 6ta gol urgan «Barsa» biroz o‘ziga kelgandek taassurot uyg‘otayotgan bo‘lsa, Madridda «Shaxtyor»dan qabul qilingan qaqshatqich zarba «Real»dagi muammolarni ko‘rsatib berdi. Zidan o‘yin oldidan ta'kidlagandek, «Barsa» bilan uchrashuv vaziyatni o‘zgartirishning eng yaxshi yo‘li». Aks holda fransiyalik murabbiyning Madriddagi faoliyati so‘roq ostida qoladi.
Ronald Kumanning tashvishlari Zidandagi kadrlar muammosiga bas kelolmaydi. Dani Karvaxal, Martin Edegor va Eden Azar maydonga tushmasligi aniq, ustiga-ustak safga qaytgan jamoa sardori Serxio Ramosning jismoniy holati qanday bo‘lishi noma'lum. «El-Klasiko» Kuman uchun ilk jiddiy sinovga aylansa, Zidan uchun oxirgi imtihonga aylanishi mumkin...
«Barselona» - «Real» so‘nggi 5 o‘yin (La Liga):
01.03.2020. Real – Barselona – 2:0
18.12.2019. Barselona – Real – 0:0
02.03.2019. Real – Barselona – 0:1
28.10.2018. Barselona – Real – 5:1
06.05.2018. Barselona – Real – 2:2.
La Liga. 7-tur
23 oktabr (juma)
00:00. Elche – Valensiya – 2:1.
24 oktabr (shanba)
16:00. Osasuna – Atletik
19:00. Barselona - Real Madrid
21:30. Sevilya - Eybar
00:00. Atletiko – Betis
25 oktabr (yakshanba)
16:00. Valyadolid – Alaves
20:00. Kadis – Vilyarreal
22:30. Xetafe – Granada
00:00. Real Sosedad – Ueska
26 oktabr (dushanba)
01:00. Levante – Selta
Italiya A Seriyasi: «Milan» - «Roma», Shomurodov «Inter»ga qarshi
Apenin yarimorolida haftaning markaziy uchrashuvi dushanba kuni «Milan» va «Roma» o‘rtasida o‘tkazilsa, ungacha shanba kungi «Jyenoa» - «Inter» o‘yini o‘zbekistonlik muxlislar diqqat e'tiborida bo‘ladi. Eldor Shomurodov to‘p surayotgan klub Genuyada A Seriya grandlaridan biri «Inter»ni qabul qiladi. Ikki klub ham chempionatning oxirgi ikki turida bir durang va bir mag‘lubiyat qayd etgan. Antonio Konte jamoasi «Jyenoa»ga qarshi bahsga g‘alaba ilinjida kelishi aniq. Odatda, favoritga qarshi maydonda ikkinchi raqam ostida to‘p suradigan «Jyenoa»dek klublar yakkakurashlarga kirishuvchi va tezkorlikka ega bir nafar hujumchi bilan maydonga tushishadi. Eldorning shunday jihatlarga ega forvardligini inobatga olsak, debyut o‘yindagi nisbatan past bahosiga qaramay, Rolando Maran Shomurodovga yana ishonch bildirishini taxmin qilish mumkin. Ammo Eldor o‘yinni zaxirada boshlashi mumkinligiga yana bir toshbosar sabab bor - «Jyenoa»ning asosiy forvardi Marko Pyatssa safga qaytgan. Har qanday holatda ham Shomurodovni «Inter»dek top-klubga qarshi o‘yinda ko‘rish qiziqarli bo‘ladi.
«Inter»ning hamshahri «Milan» A Seriyadagi peshqadamlikni saqlab qolish uchun «Roma»ni mag‘lub etishga va g‘alabali yurishini davom ettirishga intiladi. Stefano Pioli jamoasi har tomonlama Italiyaning ayni damdagi eng kuchli jamoasi sifatida gavdalanmoqda. Ibrahimovich yetakchiligidagi klub 21 o‘yindan beri mag‘lubiyat nimaligini bilmay kelayapti. «Inter»dan keyin «Roma» ham mag‘lub etilsa, «rossonerlar» skudetto borasidagi bu yilgi maqsadlari jiddiy ekanligiga ishontira boshlashadi.
A Seriya. 5-tur
23 oktabr (juma)
23:45. Sassuolo – Torino 3:3
24 oktabr (shanba)
18:00. Atalanta – Sampdoriya
21:00. Jyenoa – Inter
23:45. Latsio – Bolonya
25 oktabr (yakshanba)
16:30. Kalyari - Krotone
19:00. Parma – Spetsiya
19:00. Benevento – Napoli
22:00. Fiorentina – Udineze
00:45. Yuventus – Verona
26 oktabr (dushanba)
00:45. Milan – Roma
Bundesliga. 5-tur
23 oktabr (juma)
23:30. Shtutgart – Keln 1:1.
24 oktabr (shanba)
18:30. Union Berlin – Frayburg
18:30. Leypsig – Gerta
18:30. Mayns - Borussiya M
18:30. Bavariya - Ayntraxt F
21:30. Borussiya D – Shalke
25 oktabr (yakshanba)
19:30. Volfsburg – Arminiya
20:00. Verder – Hoffenhaym
00:30. Bayyer – Augsburg
Franitsiya 1-divizioni: 8-tur
23 oktabr (juma)
00:00. Renn – Anjye – 1:2.
24 oktabr (shanba)
20:00. Loryan – Marsel
23:55. PSJ - Dijon
25 oktabr (yakshanba)
17:00. Lans – Nant
19:00. Bordo – Nim
19:00. Brest – Strasbur
19:00. Mets - Sent-Eten
19:00. Monpele – Reyms
21:00. Nitssa – Lill
01:00. Lion – Monako
Rossiya Premer-ligasi: 12-tur
24 oktabr (shanba)
16:00. Dinamo – Sochi
18:30. Zenit – Rubin
21:00. Krasnodar – Spartak
21:00. Lokomotiv – Rotor
25 oktabr (yakshanba)
16:00. Ural – Tambov
18:30. Rostov – Ximki
21:00. Axmat – Ufa
26 oktabr (dushanba)
21:00. TsSKA – Arsenal.
Usmon Ibodov tayyorladi.