«Bu idoralararo kelishuv asosida hal qilinadi». AKT vaziri O‘zbekistonda PayPal tizimiga ruxsat berilishi kutilayotganini aytdi

O‘zbekiston 18:17 / 24.10.2020 8665

Kun.uz muxbirining xabar berishicha, jurnalist va blogerlar bilan ochiq muloqotda Axborot texnologiyalari va kommunikatsiyalarini rivojlantirish vaziri Shuhrat Sodiqov sohada olib borilayotgan ishlar bo‘yicha ma'lumotlar taqdim etdi va savollarga javob berdi.

Shuhrat Sodiqov frilanserlar va aholiga qulaylik yaratish maqsadida Paypall xalqaro to‘lov tizimini O‘zbekistonda ham ishga tushirish haqidagi Kun.uz muxbirining savoliga javob berdi.

«O‘zbekistonda PayPal xalqaro to‘lov tizimidan foydalanish bo‘yicha bizga ham murojaatlar bo‘ladi. Bu faqat bizning vazirlik doirasidagi ish emas, bu Markaziy bank vakolatidagi masala. Bu idoralararo kelishuv asosida hal qilinadi. Masalaning boshqa taraflari, ya'ni PayPal to‘lov tizimining davlatlarga qo‘yadigan shartlari va Markaziy bankdan talab qilinadigan mas'uliyatlar ham bor», – dedi vazir. 

Shuningdek, Shuhrat Sodiqov Markaziy bank hozirda PayPal bilan muzokaralarga kirishgani, O‘zbekistonda, albatta, bu tizimga ruxsat berilishi va raqobatchi sifatida mamlakatning o‘z pul o‘tkazish tizimi joriy qilinishini ma'lum qildi.

Tadbirda, shuningdek, Toshkent shahrida IT Park rezidentlari sonini ko‘paytirish va yetarli shart-sharoitlar yaratish maqsadida umumiy maydoni 408 ming kv.m.ga teng hududda xorijdan jalb qilingan ekspert bilan hamkorlikda IT Park infratuzilmasi obektlarini qurish konsepsiyasi ishlab chiqilgani aytildi.

Mehmonlar uchun IT Park ofisi, qurilish ishlari amalga oshirilayotgan hududlar hamda Toshkent teleminorasiga press-tur o‘tkazildi.

Ko‘proq yangiliklar: