«Rossiya SQCh (strategik qurollarni cheklash) shartnomasini bir yilga uzaytirishni taklif qiladi va shu orqali Qo‘shma Shtatlar bilan birgalikda ushbu davrda tomonlar ushlab turgan yadroviy kallaklar sonini muzlatib qo‘yish bo‘yicha siyosiy majburiyat olishga tayyor. Ushbu pozitsiya qat'iy va faqat eksklyuziv ravishda amalga oshirilganini anglagan holda Qo‘shma Shtatlarning qo‘shimcha talablari qabul qilinmaydi», — deyilgan Rossiya TIV bayonotida.

Ta'kidlanishicha, Moskva Vashingtondan Rossiya prezidenti Vladimir Putinning SQCh shartnomasini bir yilga uzaytirish to‘g‘risidagi taklifiga rasmiy javob olmagan.

«Rossiya tomoni joriy yil 16 oktyabrdagi amaldagi SQCh shartnomasini bir yilga uzaytirish to‘g‘risida prezident Vladimir Vladimirovich Putin tomonidan ilgari surilgan taklifni shakllantirgan notaga AQShning rasmiy javobini olmadi», deyilgan Rossiya TIV bayonotida. Moskva Vashingtonning rasmiy javobiga umid qilmoqda.

Shuningdek, tashqi ishlar vazirligi Vashington bilan ushbu asoslar bo‘yicha kelishuvga erishilgan taqdirda, «SQChning uzaytirilishi natijasida qo‘lga kiritilgan vaqt strategik barqarorlikka ta'sir qiluvchi barcha omillarni majburiy hisobga olgan holda yadroviy raketa qurollarini kelajakda nazorat qilish bo‘yicha ikki tomonlama muzokaralarni o‘tkazish uchun ishlatilishi mumkin», deb qo‘shimcha qilgan.

Avvalroq Putin «hech qanday shartlarsiz» SQCh shartnomasining amal qilish muddatini «kamida bir yilga» uzaytirishni taklif qilgandi. U Rossiya tashqi ishlar vaziri Sergey Lavrovga yaqin kelajakda AQShdan aniq javob olishga harakat qilish bo‘yicha ko‘rsatma bergan. O‘z navbatida, AQSh prezidentining milliy xavfsizlik bo‘yicha yordamchisi Robert O'Brayyen Putinning tashabbusini «muvaffaqiyatsizlikka mahkum» deb atagan.

AQSh va Rossiya ushbu shartnomani 2010 yilda imzolagan. Uning shartlariga ko‘ra, har bir tomon o‘zlarining strategik hujum qurollarini belgilangan muddat davomida kamaytirib borishi lozim.