Gaz eksporti kamaygani aholini gaz bilan ta'minlash darajasini oshirish uchun yetarli emasligi aytildi

16 oktabr kuni kuz-qish mavsumida yuzaga kelishi mumkin bo‘lgan favqulodda vaziyatlar xavfini kamaytirish bo‘yicha qilinayotgan ishlar mavzusida matbuot anjumani o‘tkazildi.

Tadbirda mas'ullarga nobop isitish moslamalaridan foydalanish oqibatida kelib chiqayotgan noxush holatlarga tabiiy gaz yetishmovchiligi ham sabab bo‘lishi mumkinligi, Rossiya va Xitoyga gaz eksporti kamaytirilgani hisobiga hududlarni ko‘proq gaz bilan ta'minlash imkoni yuzaga kelmadimi, degan mazmunda savol berildi.

{Yii::t(}

O'tkazib yuborish 6s

O'tkazib yuborish

Savolga «Hududgazta'minot» AJ mas'ul xodimi Abdusattor Qayumov javob berdi.

«Hozirgi kunda respublikamizda tabiiy gazdan foydalanadigan iste'molchilarimiz 3,7 milliondan oshadi. 3,3 mln iste'molchi esa suyultirilgan gazdan foydalanadi. Tabiiy gaz bilan ta'minlash imkoniyatimiz bor joylarga tabiiy gaz yetkazib beryapmiz, lekin imkoniyat yo‘q bo‘lgan joyga tabiiy gaz olib boramiz desak, muammolarni ko‘paytirishimiz mumkin.

Hozirgi kunda ishlab chiqarilib, bizga yetkazib berilayotgan gaz hajmidan kelib chiqib iste'molchilarga yetkazib beryapmiz. Agar resurslar ko‘paysa, yetkazib berish hajmini ham ko‘paytirish mumkin, lekin hozirgi kunda, xabaringlar bor, ko‘p qavatli uylar qurilyapti, chet ellik investorlar ishlab chiqarish korxonalarini tashkil etishyapti – bularning hammasi birinchi o‘rinda tabiiy gaz ber, deb so‘rashyapti. Shuning uchun tabiiy gazning qo‘shimcha resurslari hosil bo‘lgan taqdirdagina uni yetkazib berishimiz mumkin, lekin hozirgi kunda unaqa imkoniyatimiz yo‘q.

Eksportning kamayishi ichki iste'molchilarga yetkazib beriladigan gaz hajmini oshiradigan darajada hali yordam bermadi. Tuman va viloyat markazlaridagi [yangi] ko‘p qavatli uylarda hozir avvalgidek markazlashgan isitish tizimi emas, lokal – har bir xonadonga ikki konturli isitish moslamalari o‘rnatilyapti, ularning soatlik sarfi – 2,4 kubometr, ya'ni hovlili xonadonning gazini oladi», – dedi Abdusattor Qayumov.

Shu yil iyul oyida O‘zbekistondan Rossiyaga tabiiy gaz eksporti butunlay to‘xtagani, Xitoyga eksport hajmi esa 3 baravarga kamaygani ma'lum bo‘lgandi. Avgust oyida energetika vazirining birinchi o‘rinbosari Jo‘rabek Mirzamahmudov Rossiyaga belgilangan narxlarda gaz sotish «iqtisodiy jihatdan manfaat bermay qolgani»ni aytgandi.