Эркинжон Турдимов: «Янгиланган кутубхона Самарқанднинг чинакам зиё масканига айланади»

Ўзбекистон 22:25 / 17.10.2020 6412

Очилиш маросимида Бош вазир ўринбосари, Туризмни ривожлантириш қўмитаси раиси Азиз Абдуҳакимов, Самарқанд вилояти ҳокими Эркинжон Турдимов, «Нуроний» жамғармасининг Самарқанд вилоят бўлими раиси, Ўзбекистон қаҳрамони Ҳасан Нормуродов иштирок этдилар.

Вилоят ҳокими Эркинжон Турдимов журналистларга интервью берар экан, Университет хиёбонида жойлашган, барча қулайликларга эга ушбу маскан барча самарқандликлар учун ҳақиқий зиё масканига айланишини таъкидлаб ўтди.

А.Абдуҳакимов, Э.Турдимов ва Ҳ.Нормуродовга кутубхонанинг фахрий ID карталари топширилди.

Кутубхона 1,5 йил давомида мукаммал таъмирланди. 109 йиллик тарихга эга кутубхонанинг реконструкция ишларига маҳаллий бюджетдан 6 миллиард 600 миллион сўм маблағ сарфланган.

1911 йилда асос солинган ушбу зиё маскани дастлаб 2 минг нусхага яқин адабиёт билан фаолият бошлаган. Айни пайтда бу ерда сақланаётган китоблар сони 650 мингга яқин.

Мукаммал таъмирдан чиқарилган кутубхонада айниқса нодир китобларни сақлаш бўлмаларининг таъмирига алоҳида эътибор қаратилган. «Қадимий китоблар бизгача сақлаб келиндими, биз ҳам уни келгуси авлодларга зиён етказмасдан сақлаб етказишимиз керак», — деди Э.Турдимов.

Шуҳрат Шокиржонов тайёрлади.

Тасвирчи: Жаҳонгир Алибоев.

Кўпроқ янгиликлар