Дунёдаги вазият: коронавирусга қарши дориларнинг самарасизлиги ва Европада маҳаллий локдаунлар

Жаҳон 08:29 / 17.10.2020 8434

Жонс Ҳопкинс университети маълумотларига кўра, пандемия бошлангандан бери дунё бўйлаб 39 млн инсон касалланди, Covid-19 қурбонлари сони миллиондан ортиб кетган.

Коронавирус инфекциясини «Ремдесивир» тажрибавий дориси билан даволаш беморларнинг ўлими сонига сезиларли даражада таъсир ўтказмайди. Бу ҳақда Жаҳон соғлиқни сақлаш ташкилотининг клиник тадқиқотлари гувоҳлик бермоқда. ЖССТ 11,2 минг беморни даволаш жараёнини текшириб, шундай хулосага келдики, ҳеч қайси дори беморнинг яшаб кетиш имкониятларига таъсир ўтказмаган ва уларнинг сунъий нафас олдиришга эҳтиёжини пасайтирмаган.

Бунда гап нафақат «Ремдесивир», балки «Гидроксихлорохин», «Лопинавир» ва «Интерферон» ҳақида ҳам бормоқда. Бундан ташқари, ЖССТ тадқиқоти бу дорилар коронавирусга чалинган беморнинг касалхонада ётиш вақтини деярли қисқартирмаслигини кўрсатган.

«Ремдесивир» Американинг Gilead Scienceс фармакологик компанияси томонидан дастлаб Эбола безгагига қарши восита сифатида ишлаб чиқарилган. Апрелдаги синовлардан кейин у АҚШда ва Евроиттифоқда Covid-19 билан касалланиш ҳолатида қўллаш учун маъқулланди. АҚШ Миллий саломатлик институтлари «Ремдесивир» даволаниш вақтини ўртача 15 кундан 11 кунгача қисқартиришини айтган эди. Gilead Scienceс июлда эълон қилган маълумотларда дори коронавирусдан вафот этиш эҳтимолини камайтириши айтилганди, аммо булар назорат тадқиқоти томонидан тасдиқланмади.

Финлар бош вазири карантинга кетади
Финляндия бош вазири Санна Марин у яқинда учрашган Финляндия парламенти аъзосига Covid-19 ташхиси қўйилганлиги ойдинлашгач, Брюсселда старт олган ЕИ раҳбарлари саммитини тарк этишга мажбур бўлди. У Хельсинкига қайтади, тестдан ўтади ва профилактик изоляциясига олинади.

Бу икки кун ичидаги иккинчи ҳодиса: Еврокомиссия раҳбари Урсула фон дер Ляйен ўзининг нутқидан бир неча соат ўтгач саммитни тарк этди, унга ҳам яқин орада суҳбатда бўлган инсонларидан бирида коронавирус ташхиси аниқлангани ҳақида хабар қилинган. Ляйен топширган таҳлилдан манфий натижа олинган. 

Брюсселдаги саммит мавзуси асосан Европа мамлакатларидаги таҳликали эпидемиологик вазиятга қаратилган. Касалланиш ҳолатларининг кескин ўсиши деярли ҳамма жойда қайд этилган. Бир неча мамлакатдаги касалхоналар яна Covid-19 касаллари билан тўлиб тошяпти.

ЕИнинг баъзи раҳбарлари фикрига кўра, пандемияга қарши самарали курашиш учун итттифоқ мамлакатлари бир хил чеклов чораларини жорий қилиши керак, аммо бу таклиф ҳозирча умумий ҳолатда қўллаб-қувватланмади.

Британиядаги зиддиятлар
Британиянинг Ланкашир графлигига якшанба кунидан бошлаб мамлакат минтақаларида касалланиш ҳолатининг янги таснифи бўйича энг юқори учинчи даража берилади. 

Ушбу тоифа биринчи бўлиб Ливерпулга берилган. Даражалар алоҳида шаҳарларга ҳам, бутун графликларга ҳам берилиши мумкин. Тоифалаш қуйидагича: биринчи даража - ўртача хавфли, иккинчиси юқори ва учинчиси энг юқори даражада хавфлидир.

Учинчи тоифага тушиб қолиш энг қатъий чеклов чораларини жорий қилишни англатади. Аммо, Ливерпулдаги вазиятдан фарқли ўлароқ, Ланкаширдаги спорт заллари ўз фаолиятини давом эттириши мумкин. Ливерпул мэри бу ҳолатни тўла чигал ва адолатсиз деб атаб, марказий ҳукуматдан изоҳ талаб қилди. Умумий ҳолда Англияда коронавирус статистикаси сўнгги бир ҳафта ичида 50 фоизга ошди, деб хабар беради Буюк Британия Миллий статистика идораси. Уэльс маъмурияти беморлар сонининг кескин кўпайиши сабабли қисман локдаун жорий этиш имкониятини кўриб чиқмоқда. 

Буюк Британия ўлим ҳолатлари сони бўйича Европада (43,3 минг) етакчи бўлиб, касалланиш ҳолатлари сони бўйича Испания ва Франциядан кейинги учинчи ўринда туради (676,4 минг). 

Франция бўйлаб комендантлик соати
Жума куни ярим тундан бошлаб Франциянинг йирик шаҳарлари - Париж, Лион, Марсел, Лилль, Руан ва бошқа шаҳарларда комендантлик соати кучга кирди. Ушбу чеклов умумий ҳисобда 22 миллионга яқин инсонга тааллуқли. 

Комендантлик соати кечки 9:00дан эрталаб 6:00гача амал қилади. Биринчи марта қоидани бузувчилар 135 евро жаримага тортилади, ҳолат қайта кузатилган тақдирда олти ойгача қамоқ жазоси ва 3750 евро миқдорида жарима қўлланади.

Фақатгина югуришга ва кучугини айлантиришга чиққан инсонлар бундан мустасно. Бироқ, биринчи локдаунда бўлгани каби, улар ўзлари билан махсус рухсатномани олиб юриши керак. 

Сўнгги пайтларда Францияда касалланиш ҳолатлари статистикаси ўсиб бормоқда. Эпидемия бошидан бери мамлакатда 850,1 минг киши вирусдан зарарланди, 33,1 минг киши вафот этди. 

Польшада рекорд даражадаги қурбонлар сони
Польшада Covid-19 ва у билан боғлиқ сабаб туфайли ўлимнинг кунлик кўрсаткичи рекорд даражага кўтарилди - 132 ўлим. Бу бутун эпидемия даври учун энг катта рақам. Шунингдек, сўнгги 24 соат ичида 7705 нафар янги бемор аниқланди, бу иккинчи энг юқори кўрсаткичдир.

Шанба кунидан бошлаб мамлакат ҳудудларининг деярли ярми, шу жумладан, Варшава ва бошқа йирик шаҳарларда қаттиқ чекловлар жорий этилади.

Ўрта мактаб ва университет талабалари яна масофадан ўқитилади. Кўп меҳмонли базмлар, шу жумладан, тўй ва бошқа уйларда истиқомат қилувчи инсонлар билан оилавий йиғинлар ўтказиш тақиқланади. Жамоат жойларида 10 кишигача гуруҳ бўлиб тўпланиш мумкин. 

Бар ва ресторанларга ташриф буюрувчилар сони муассасалар сиғимининг 50 фоизидан ошмаслиги керак. Кечки соат 9:00дан бошлаб хизмат фақат овқат олиб кетиш учун кўрсатилади.

Швейцарияда вирус авж олиши
Швейцария ҳукумати сентябрь ойида йодел қўшиқчиларининг Швиц кантонида бўлиб ўтган концерти мамлакат ичкарисида вирус тарқалиши учун шароит яратиб берганини тан олди. Концертга 600 томошабин ташриф буюрган.

Концерт ташкилотчилари улардан масофа сақлашни илтимос қилишган, аммо ниқоб кийиш мажбурий бўлмаган. 

Концертдан тўққиз кун ўтгач, унга ташриф буюрган гуруҳларга Covid-19 ташхиси қўйилгани маълум бўлди.  Кейинги бир неча ҳафта ичида кантонда касалланганлар сони 1230 нафарга етди. 

Исроил локдаундан чиқяпти
Исроил расмийлари мамлакатни сентябрь ўрталарида жорий қилинган такрорий умуммиллий локдаундан босқичма-босқич олиб чиқишга келишиб олишди. Шифокорларнинг фикрига кўра, сўнгги бир ой ичида касалланиш билан боғлиқ янги ҳолатларнинг кунлик даражаси сезиларли даражада - 9 мингдан 2 мингдан камроққа тушди. 

Якшанба кунидан бошлаб исроилликлар ўз уйларидан 1 километрдан ортиқ масофада ҳаракатланишлари мумкин бўлади. Болалар боғчалари очилади, ресторанлар олиб кетиш учун таомлар тайёрлаши мумкин. 

Пляж ва паркларга бориш ҳамда Қуддусдаги Ғарбий Деворда ибодат қилишга қайта рухсат берилади. Мусулмон ва насроний зиёратгоҳлари ҳам зиёратчилар учун очиқ.

Эпидемия бошланганидан бери Исроилда умумий ҳолатлар сони 301,3 минг кишини ташкил этди, 2139 киши вафот этди. 

Учиш қанчалик хавфсиз?
АҚШ мудофаа вазирлиги вакиллари, агар барча йўловчилар ниқобда бўлса, самолёт бортида коронавирус билан касалланиш хавфи минимал эканлигини тасдиқлаган тадқиқот ўтказишди. Тажрибалар Boeing самолётларининг узоқ муддатли парвозлари давомида амалга оширилди. 

Олимлар коронавирусни таший оладиган заррачаларнинг 99 фоизгача қисми шамоллатиш тизими орқали 6 дақиқа ичида фильтрланишини аниқлашди. 

Шу билан бирга, улар тажриба шароитида, бортда коронавирусга чалинган фақат бир бемор бўлганини таъкидлашади. Шунингдек,  вазият йўловчиларнинг салон атрофида айланиб юриши ҳолатида синовдан ўтказилмаган.

Шунга қарамай, тажриба муаллифлари унинг натижаларини жуда қувонарли деб ҳисоблашмоқда.

Кўпроқ янгиликлар