«Rostov» Shomurodovni «Jyenoa»ga 9 million yevroga sotishga rozi bo‘ldi

Sport 17:45 / 29.09.2020 16049

Manbaning yozishicha, «Rostov» klubi rahbariyati dastavval italiyaliklarning 8 million yevrolik taklifini rad etgan. Ko‘p o‘tmay, muzokaralarda Italiya A Seriyasi klubi Eldor Shomurodov uchun barcha bonuslari bilan qo‘shib hisoblaganda narxni 9 million yevroga ko‘targan. Yangilangan taklifni esa «Rostov» klubi qabul qilgan.

Qayd etilishicha, kelishuvga ko‘ra Rossiya klubi Eldor Shomurodovning keyingi transferidan tushadigan 15 foizi miqdoridagi mablag‘ga ham ega bo‘ladi. 

Tomonlar barcha masalada kelishishgan, faqat Shomurodov transferi uchun to‘lanadigan jami mablag‘ qancha muddat davomida taqsimlab to‘lanishi masalasi borasida bir to‘xtamga kelish qolgan.

Ma'lumot uchun, Shomurodov 2017 yildan buyon rostovliklar safida to‘p surmoqda. Futbolchining shartnomasi 2024 yilga qadar belgilangan. Transfermarkt portali hujumchining transfer bahosini 6,5 million yevroga baholagan.

Eldor Shomurodov o‘tgan mavsumda Rossiya Premer-ligasida 11ta gol urib, to‘purarlar qatoridan joy olgandi. Joriy mavsumda u 9 o‘yinda bitta gol muallifiga aylangan. Shuningdek, Eldor Yevropa ligasi 3-saralash bosqichi doirasida o‘tgan hafta «Makkabi» (1:2) klubi darvozasini ishg‘ol etgandi.

Ko‘proq yangiliklar: