Шри-Ланка Британиядан келтирилган 260 тонна хавфли чиқиндини ортга қайтариб юборди

Ўзбекистон 09:59 / 28.09.2020 2934

Шри-Ланка Британиядан қайта ишлаш учун келтирилган 21 та контейнердаги 260 тонна чиқиндини уларда хавфли кимёвий материаллар аниқлангандан кейин ортга қайтариб юборди. Божхоначиларнинг таъкидлашича, 2017 йилда Британиядаги хусусий компания томонидан импорт қилинган 263 та контейнердаги чиқинди орасида шифохоналар чиқиндилари, пластик ва полиэтилен, жумладан ўликхона чиқиндилари аниқланган. 

Декларацияда эса юк фойдаланилган матраслар, гиламчалардан иборат экани кўрсатилган. Контейнерларнинг аксарияти омборларда сақланган ва фақат кичик ҳажми бошқа давлатларга қайта экспорт қилинган. Шри-Ланка расмий идораларининг таъкидлашича, чиқиндиларни етказган компания хавфли чиқиндиларни сақлаш ва утилизация қилиш бўйича халқаро ва Европа қоидаларини қўпол бузган. Баъзи контейнерларда ҳаттоки шифохоналарда ампутация қилинган одам қўл-оёқлари бўлган.

Коломбодаги расмий идоралар 100тага яқин контейнердан чиринди ҳиди тарқала бошлангандан кейин уларда металл утилизацияси баҳонасида олиб кирилган чириётган чиқиндиларни аниқлаган. “Биз бу шифохона чиқиндилари эканини биламиз ва баъзи контейнерларда одам қолдиқлари бўлиши мумкинлигини гумон қилмоқдамиз. Уларни ҳиди ва контейнерлардан оқиб чиқаётган суюқлик сабабли ўрганиб чиқиш қийинчилик туғдиради”, деб айтган Шри-Ланка божхона вакили Сунил Жаяратне.

Британия каби бой давлатлар қайта ишланувчи чиқиндиларни ривожланаётган давлатларга жўнатади. Бундай “импорт”нинг катта қисми охир-оқибат чиқиндихоналарда чириб кетади ёки ёқиб юборилади. Охирги икки йилда Осиё-Тинч океанининг баъзи давлатлари Европа ва Шимолий Америка давлатларидан қайта ишлаш учун импорт қилинадиган чиқиндиларни ортга қайтаришни бошлаган. Мисол учун, Малайзия январда Британияга пластик чиқиндилар сақланган 42 та контейнерни қайтариб юборган. 

Кўпроқ янгиликлар