Shvetsiyalik yengil atletikachi Arman Dyuplantis langarcho‘p bilan balandlikka sakrashda sobiq ittifoq va Ukrainaning nomdor sportchisi Sergey Bubkaning jahon rekordini yangiladi.

Sportchi bunga “Brilliant ligasi”ning Rimda o‘tgan bosqichida erishdi. U 6,15 metrga balandlikka sakrab, ochiq inshootlardagi musobaqalar uchun Bubka tomonidan 1994 yilda o‘rnatilgan rekordni 1 smga yaxshilay oldi.

E'tiborlisi, Armanga yana bir yuqori natija tegishli bo‘lib, u yopiq inshootlardagi musobaqalarda balandlikka sakrash bo‘yicha jahon rekordchisi hisoblanadi. Sportchining natijasi 6,18 metrni tashkil qilib, u bunga fevral oyida o‘tgan musobaqada erishgan. Bundan bir hafta oldin esa u 6,17 metrga sakrab, fransiyalik yengil atletikachi Reno Lavillenining natijasini 1 smga yaxshilay olgandi.

Ayollar orasida bu sport turi bo‘yicha jahon rekordi ochiq inshootlardagi musobaqalar uchun rossiyalik Yelena Isinbayevaga (5,06 metr), yopiq inshootlardagi musobaqalar uchun amerikalik Jyennifer Surga (5,03 metr) tegishli.