DXX xorijiy valuta bilan bog‘liq noqonuniy holatlarga chek qo‘ydi

Jamiyat 11:09 / 18.09.2020 6658

Mahalliy fuqaro X.N. 180 ming AQSh dollarini chegara to‘sig‘i ustidan uloqtirish orqali qo‘shni Qirg‘iziston Respublikasiga o‘tkazmoqchi bo‘lganida ushlandi.

Dastlabki surishtiruv harakatlari davomida aniqlanishicha, X.N. 200 ming so‘m evaziga ushbu chet el valutasini davlat chegarasidan o‘tkazib berishi kerak bo‘lgan.

Hozirda X.N.ga nisbatan jinoyat ishi qo‘zg‘atilib, xorijiy valutaning haqiqiy egasini aniqlash bo‘yicha chora-tadbirlar ko‘rilmoqda.

DXX Buxoro viloyati boshqarmasi xodimlarining Bosh prokuratura huzuridagi Departamentning hududiy boshqarmasi bilan hamkorlikda o‘tkazgan tezkor tadbiri natijasida, Buxoro shahrida katta miqdordagi qalbaki xorij valutasining muomalaga kiritilishiga chek qo‘yildi.

Xususan, mamlakatimizga yashirincha olib kelingan soxta chet el valutasini Toshkent shahrida yashovchi T.X. va T.M. sotish maqsadida Buxoro shahriga olib borishadi. Ular qalbaki 88 450 AQSh dollarini 34 000 AQSh dollariga sotgan vaqtlarida ashyoviy dalillar bilan ushlandi. Shuningdek, ularning yonida yana 10 050 soxta AQSh dollari borligi ma'lum bo‘ldi. Tezkor tadbir davomida jami 98 500 qalbaki AQSh dollari musodara qilindi.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.

Ko‘proq yangiliklar: