Мактабни очиш ёки ёпиш тўғрисидаги қарор ўқитувчи ва ўқувчиларнинг хавфсизлигини кўзлаб қабул қилинади - ХТВ

Ўзбекистон 13:35 / 16.09.2020 5110

Бугунги кунда барча ҳудудларда мактаб ўқитувчиларининг COVID-19 инфекциясига тест топшириш жараёни амалга оширилмоқда

Халқ таълими вазирлиги маълумотига кўра, тест топшириш жараёнида натижалар мусбат чиқаётган ҳолатлар ҳам бор. Аксарият ўқитувчиларда касаллик аломатларсиз енгил ҳолда кечаётгани сабабли, уларнинг айримлари ўзлари ҳам вирусни бошидан кечираётганидан бехабар бўлган.

Шайхонтоҳур тумани Санитария эпидемиологик осойишталик марказининг маълумотига асосан, COVID-19 инфекцияси аниқланган ўқитувчилар фаолият юритаётган Тошкент шаҳри Шайхонтоҳур туманидаги 40- ва 262-сонли мактаблар фаолияти эҳтиёткорлик ҳамда хавфсизлик мақсадида Маҳаллий кенгаш қарори билан вақтинча тўхтатилди. 

“Бутунжаҳон соғлиқни сақлаш ташкилоти мазкур вирус 2 йилгача чекинмаслигини прогноз қилган. Бугун ҳар биримиз ушбу вирус билан яшашга, ҳеч қандай хавотирга тушмасдан ҳаёт тарзимизни давом эттиришга ўрганишимиз лозим. 

Маҳаллий кенгаш депутатлари томонидан қабул қилинган мактабларни ёпиш ёҳуд очиш тўғрисидаги қарорлар у ёки бу мактаб жамоаси ва мактаб ўқувчилари, яъни болажонларимизнинг саломатлигини ўйлаб амалга оширилади. Шу боис ўқитувчиларимиздан ҳам ота-оналардан ҳам бундай ҳолатларда ортиқча хавотирга тушмаслик санитария-гигиена қоидаларига риоя қилган ҳолда одатий ҳаёт тарзини давом эттиришларини сўраб қоламиз. 

Бундай ҳолатларда ота-оналардан талаб қилинадиган асосий нарса масофадан яратиб берилаётган таълим имкониятларидан фойдаланиб, фарзандлари билим олишини назорат қилишдан иборат. Бу масалага жиддий ёндашишингизни илтимос қиламиз”, - дейилади вазирлик ахборотида.

Қайд этилишича, карантинга олинган мактаблар дезинфекция ишлари амалга оширилганидан сўнг Маҳаллий кенгаш депутатлари қарори билан яна ўз фаолиятини тиклайди.

Шу билан бирга, бугунги кунда барча ҳудудларда очилмаган мактаблар фаолиятини тиклаш бўйича ишлар кетаётгани ҳам таъкидланган.

Президент топшириғи билан мактабларни очилиши ҳамда ёпилиши тўғрисидаги қарорни қабул қилиш ваколати фақатгина Маҳаллий кенгаш депутатларига топширилган.

16 сентябрь ҳолатига республикада 2 550 та (25 фоиз) мактаб ўз фаолиятини анъанавий шаклда амалга оширмоқда.

Кўпроқ янгиликлар