Uzbekistan Airways мунтазам авиақатновларни босқичма-босқич тиклайди. Парвозлар вақтида амал қиладиган чекловлар маълум қилинди

Ўзбекистон 21:21 / 11.09.2020 33545

Авиакомпания Covid-19 тарқалишининг олдини олиш мақсадида сервис хизматларига қуйидаги ўзгартиришлар киритилганини маълум қилган:

  • Барча экипаж аъзолари парвоздан олдин мажбурий тиббий текшируви ва ҳарорат ўлчовларидан ўтадилар. Бутун парвоз давомида улар тиббий ниқоб ва ҳимоя қўлқопларида бўлишади.
  • Ҳар бир рейсдан сўнг самолёт махсус воситалар билан яхшилаб тозаланади, юза ва ашёларга ишлов берилади. 
  • Самолётнинг йўловчилар бўлинмасида ҳаво вентиляцияси юқоридан пастга айланади. Бу эса бошқа қатордаги йўловчилардан кимдир акса урганда ҳаво томчилари бошқа йўловчиларнинг нафас йўлларига тушмаслигини таъминлайди. Йўловчиларнинг ниқобда бўлишлари эса кичик заррачалар тарқалишининг олдини олади.
  • Uzbekistan Airways авиакомпанияси самолётлари вирус  ва бактерияларнинг 99,97 фоизини  ушлаб қолувчи замонавий НЕРА-фильтрлари билан жиҳозланган.
  • Сув, қулоқчинлар, озиқ-овқат, шунингдек бизнес класс учун йўл ва болалар тўпламлари алоҳида ўрамларда берилади. 

«Умид қиламизки, киритилган чекловлар сизнинг парвоздан оладиган таассуротларингизга таъсир кўрсатмайди. Эпидемиологик вазият яхшиланиши билан, тўлиқ сервис хизматларини  кўрсатишга қайтамиз», дейилади авиакомпания хабарида.

Шунингдек, йўловчилар хавфсизлигини таъминлаш учун самолёт саҳнида амал қилиниши лозим бўлган қоида ва тавсиялар келтириб ўтилган:

  • бутун парвоз давомида йўловчилар оғиз ва бурунни ёпиб турувчи ниқобларни тақишлари шарт (2 ёшгача бўлган болалардан ташқари);
  • қўл юки сифатида сиз аёллар сумкаси, портфел, ноутбук, болалар бўлса, улар учун керак бўладиган ашёлар солинган сумкани олиш мумкин. Бошқа барча буюмлар қатновга рўйхатдан ўтилаётган вақтда багажга топширилиши шарт;
  • ҳаво кемасига чиқариш ижтимоий масофа сақлаган ҳолда амалга оширилади;
  • агар йўловчи парвоз пайтида ўзини ёмон ҳис қилса (иситма, йўтал, тумов ва бошқалар), зудлик билан борткузатувчини чақириш тугмасини босиши керак. Экипаж касаллик белгилари бўлган йўловчига қандай муносабатда бўлишга ўргатилган;
  • парвоз пайтида ҳаво кемаси саҳнида ҳаракатланишдан тийилиш тавсия этилади. Ҳожатхонага ташриф буюриш учун, унинг бўшлигига ишонч ҳосил қилиш мақсадида ёруғлик таблосига эътибор қаратиш, ҳожатхона олдида навбат ҳосил бўлишига йўл қўймаслик керак;
  • самолёт ерга қўнганидан сўнг, экипажнинг кўрсатмасига қадар ўриндан турмаслик сўралади. Ҳаво кемасидан тушиш ҳам, худди унга чиққандек, ижтимоий масофага амал қилган ҳолда амалга оширилади.

Эслатиб ўтамиз, сентябрь ойи бошида Ўзбекистон ҳукумати барча турдаги халқаро қатновларни босқичма-босқич тиклашини маълум қилганди.

4 сентябрдан Ўзбекистон 5та давлат билан - Германия, Қозоғистон, Қирғизистон, Бирлашган Араб Амирликлари ва Туркиядан мунтазам рейслар бошланиши ҳақида эълон қилди. Бу давлатлардан Uzbekistan Airways рейсларида Ўзбекистонга келишни режалаштирган йўловчилар парвоздан 72 соат олдин COVID-19’га ПЗР усулида олинган тест ҳақидаги маълумотномани рус ёки инглиз тилида тақдим этишлари керак. Тест мусбат натижа берган бўлса, йўловчилар парвозга чиқарилмайди. Бу давлатлардан келганлар Ўзбекистонда 14 кун давомида изоляция қилиши талаб этилади.

4 сентябрь куни Туркия ва БААдан рейслар бошланди, 10 сентябрь куни Германия, 11 сентябрь куни Қозоғистон билан мунтазам рейслар тикланди, 14 сентябрь куни Тошкент - Бишкек - Тошкент йўналиши бўйича парвозлар амалга оширилиши бошланади.

Ҳозирча эпидемиологик вазият туфайли Россия билан авиақатновлар тикланмаган. 

Бошқа давлатлар билан доимий рейслар айнан қачондан очилиши номаълум бўлиб қолмоқда.

Шунингдек, йўловчилар қачондан ҳеч қандай чекловларсиз ва истаган йўналишлари бўйича учиб кетишлари мумкин бўлиши маълум эмас.

Кўпроқ янгиликлар