Польшада ўқиётган ўзбекистонлик ёшлар томонидан онлайн таълим учун ишланган янги дастур семинари ўтказилди

Ўзбекистон 16:03 / 15.08.2020 3677

Семинарда Ёшлар парламентининг келгусидаги фаолияти юзасидан иш режалари муҳокама қилинди. Шунингдек, Польшанинг Варшава шаҳридаги Вистула университетида таҳсил олаётган ўзбекистонлик талабалар томонидан яратилган «Сократус» платформасининг тақдимоти ўтказилди.

«Сократус» платформаси бутун дунёда ҳукм сураётган коронавирус пандемияси шароитида таълим муассасаларидаги дарс жараёнларини онлайн тарзда ташкил этишда ёрдам берадиган платформа ҳисобланади.

Бу ҳақда дастур муаллифларининг ўзи шундай дейди:

Жавоҳир Турғунов, дастур бошқарувчиси

Дастурчилар гуруҳимиз охирги 5 ой давомида масофавий таълим тизимини осонлаштирадиган платформани яратиш учун тинимсиз ишлади. Бу изланишлар давомида биз ўқув жараёнини бошқариш, осонлаштириш ва автоматлаштириш учун онлайн платформа яратдик. Бу платформани биз  «Сократус» деб атадик.

Бу платформанинг ўзига хос томони – соддалаштирилган фойдаланувчи интерфейси ҳисобланади. Дастурни ишлатишда асосий эътиборни платформанинг соддалиги ва қулайлигига қаратдик.

Дастур ўз фойдаланувчиларига иш тушунчасини дарҳол англашга имкон берадиган бошқарувнинг иерархик тизимидан фойдаланади.

Жавлон Ҳакимжонов, ёш дастурчи

Жавлон Ҳакимжонов ва Шамсиддин Парпиев

«Сократус» юқорида айтилган хусусиятлардан ташқари, қуйидаги имкониятларга ҳам эга:

·       Ўқувчи ва талабаларга тайёрланган уй вазифаларини юбориш ва қабул қилиш;

·       ўқитувчилар учун талабаларни баҳолаш. Бунда ҳар бир топшириқ учун ва ўқув йилининг чораги учун баҳоларни қўйиб бориш ва ҳисоблаш имкониятининг борлиги;

·       хабарномаларни юбориш ва қабул қилиш;

·       талабалар ҳақидаги маълумотларнинг хавфсизлигини таъминлаш;

·       платформани оптималлаштирилган режимда ишлашга имкон берадиган динамик тизим.

Дастурдаги бу афзалликлар кўп ойлик ривожланиш натижаси ҳисобланади. Умид қиламизки, «Сократус» платформаси онлайн таълим жараёнини осонлаштиради ва илм-фанимиз ривожида хизмат қилади.

Шамсиддин Парпиев, ёш дастурчи

Албатта, дастурни ҳали мукаммал ҳолга келди, деб бўлмайди. Унинг устида ишлашда давом этамиз. Ундан келажакда Олий ўқув юртлари ва умумий ўрта таълим мактабларида фойдаланиш мумкин.

Семинар давомида унда иштирок этганлар томонидан дастурни амалиётга киритишдаги қулайликлари ва устида ишлаш лозим бўлган жиҳатлари борасида фикр билдирилди.

Жумладан, Олий ва ўрта махсус, Халқ таълими, Инновацион ривожланиш ҳамда Ахборот технологиялари ва коммуникацияларини ривожлантириш вазирликлари мутахассислари ёш дастурчиларга ўз тавсияларини берди.

Масалан, Ахборот технологиялари ва коммуникацияларини ривожлантириш вазирлиги тасарруфидаги IT паркнинг халқаро фаолият бўйича директори ўринбосари Баҳодир Аюповнинг фикрича, ёш дастурчилар онлайн масофавий таълим платформасини тузишга ҳаракат қилган ва у жуда қизиқарли лойиҳа ҳисобланади, аммо «Сократус»ни онлайн масофавий таълим тизими деб бўлмайди.

Баҳодир Аюпов

«Чунки, онлайн масофавий таълим платформасининг миқёси бундан кўра анчайин катта бўлиши керак. Буларда асосан таълим жараёнини маъмурий бир ускунаси дейиш мумкин. Яъни, у таълим жараёнининг устида туриб, уни мувофиқлаштирадиган ускуна.

Агар бунга шундай тизим деб қарасак, у кундалик фаолиятимиздаги kundalik.uz’нинг рақиби дейиш мумкин.

Дастурчи йигитлар янги тизимни мактабларга бориб таклиф қиламиз дейишяпти, аммо бу жуда қийин, ўйлашимча, бозорни эгаллаш осон бўлмайди», – дейди у.

Тадбир давомида Ёшлар парламентининг Компьютер технологиялари, инновацион ғоялар, стартаплар ва агрокластер масалалари комиссияси томонидан яратилган шу каби дастурларнинг семинарлари ташкил этиб борилиши ҳақида маълумот берилди.

Тадбир якунида Kun.uz мухбири Сенат ҳузурида Ёшлар парламентининг ташкил қилиниши ва бундан қандай мақсадлар кўзлангани борасида Сенатор Дилором Тошмуҳаммедова билан кичик интервью уюштирди.

– Охирги вақтларда сизни Ёшлар парламенти йиғинларида кўп кўряпмиз. Жамоатчилик асосида тузилган бу органдан қандай мақсадлар кўзланган ўзи?

Дилором Тошмуҳаммедова

– Ёшлар парламентини тузишда ёшларнинг манфаатларини кўзлаш, уларни қўллаб-қувватлаш, ҳуқуқларини ҳимоя қилиб, қийнаётган масалаларини ёшларнинг ўзи орқали Сенат минбаригача олиб чиқиш мақсади кўзланган.

Бундан ташқари, президент Ўзбекистоннинг ривожланишида ёшларнинг ўрнини кўпайтириш борасида йиғилишларда кўп гапирмоқда.

Биз уларни қарор қабул қилиш жараёнларига кўпроқ жалб қилишимиз керак. Шунингдек, улар орқали Ўзбекистоннинг кадр потенциали кучайтирилади.

Ўзбекистондаги бу амалиёт шу пайтгача ҳам дунёнинг кўплаб давлатларида бор. Масалан, илк бор 1950 йилда АҚШда ёшлар парламенти ташкил қилинган. 1987 йлда Европа иттифоқида, шунингдек, бугунги кунда Европа иттифоқига кирувчи барча давлатларда 50 мингдан ортиқ фаол ёшлар шундай парламентларнинг аъзоси ҳисобланади.

Аксарият давлатларда Парламентнинг ҳар бир палатасида бу каби ёшлар парламенти гуруҳлари ишлайди. Масалан, Россия федерациясида ҳам Сенат, ҳам қуйи палатасида бу орган бор.

Сенатор Дилором Тошмуҳаммедова интервью давомида шунингдек, ёшлар таклифларини қўллаб-қувватлаш, уларни амалиётга жорий қилишда ўтказилган семинар илк қадам эканлиги ва у келгусида ҳам давом этишини кўшимча қилди.

Кўпроқ янгиликлар