Ўзбекистонда янги давлат стипендияси таъсис этилади

Ўзбекистон 17:08 / 15.08.2020 30575

Вазирлар Маҳкамасининг «Камолиддин Беҳзод номидаги давлат стипендиясини таъсис этиш тўғрисида»ги қарори лойиҳаси эълон қилинди.

Камолиддин Беҳзод номидаги давлат стипендиясини тайинлаш тартиби тўғрисида Низом тасдиқланади.

Низомга кўра, Камолиддин Беҳзод номидаги давлат стипендияси Ўзбекистон Республикаси давлат олий таълим муассасаларининг тасвирий санъат, амалий санъат, дизайн,санъатшунослик ҳамда музейшунослик йўналишларининг охирги икки курсида таълим олаётган бакалавриат босқичи талабаларига тайинланади.

Келгуси ўқув йили учун давлат стипендияси сони жорий ўқув йили охирида Ўзбекистон Бадиий академияси тақдимномасига биноан Вазирлар Маҳкамаси томонидан белгиланади.

Бадиий академия Ўзбекистон Республикаси давлат олий таълим муассасалари бўйича давлат стипендиясини тақсимлашни таълим ихтисослиги ва талабалар сонига мувофиқ амалга оширади.

Давлат стипендияси давлат олий таълим муассасалари талабаларига Бадиий академия томонидан ўтказиладиган танлов натижаларига асосан тайинланади.

Давлат стипендияси квотаси қуйидаги таълим йўналишларининг ҳар бири бўйича биттадан алоҳида-алоҳида тақсимланади:

  • рангтасвир (турлари бўйича);
  • графика ва миниатюра;
  • ҳайкалтарошлик (турлари бўйича);
  • амалий санъат (турлари бўйича)
  • дизайн (турлари бўйича);
  • санъатшунослик ва музейшунослик (турлари бўйича).

Давлат стипендиясига сазовор бўлган талабаларга «Камолиддин Беҳзод номидаги давлат стипендиясининг соҳиби» гувоҳномаси берилади.

Гувоҳнома талабаларга Бадиий академия томонидан тантанали равишда топширилади.

Давлат стипендиясига сазовор бўлган талабалар бакалавриат босқични тугатганидан сўнг бир йил мобайнида тегишли мутахассислик бўйича магистратурага кириш имтиҳонларисиз, грант асосида қабул квотаси доирасида қабул қилинади.

Давлат стипендияси соҳиблари ўқишни тугатганларидан сўнг бир йил мобайнида магистратурада ўқишни давом эттириш учун хорижга юборилаётган ёшлар гуруҳлари таркибига киритилишида устунликка эга бўлиш ҳуқуқини сақлаб қоладилар.

Кўпроқ янгиликлар