Farg‘ona viloyatida 11 avgustdan boshlab, viloyat hududidagi umumiy ovqatlanish obektlari, jumladan, oshxona, choyxona, restoran va kafelar faoliyatiga ruxsat berildi, deb xabar bermoqda Kun.uz muxbiri.

Ma'lum bo‘lishicha, bu — viloyatdagi epidemiologik vaziyat jilovini mahkam ushlagan holda karantin talablarini bosqichma-bosqich yumshatishga qaratilgan choralardan biridir. 

Umumiy ovqatlanish shoxobchalari karantin talablari va sanitariya-gigiyena qoidalariga qat'iy amal qilib, kirish-chiqish joylarini pirometrlar, antiseptik vositalar bilan ta'minlangan holda o‘z faoliyatini qayta boshlashlari mumkin bo‘ladi. Bunda, faoliyatini davom ettirishga ruxsat etilgan tadbirkorlik sub'yektlarida tegishli organlar tomonidan karantin talablari, sanitariya-epidemiologik qoidalariga rioya etilishi ustidan nazorat olib boriladi. 

Umumiy ovqatlanish obektlaridagi barcha xodimlar tibbiy niqob va qo‘lqopda bo‘lishi, ijtimoiy masofani saqlashi shartligi belgilangan. 

Restoran va kafelarda banketlar hamda boshqa ommaviy tadbirlarni o‘tkazishga yo‘l qo‘yilmaydi hamda faoliyatini soat 8:00 dan 20:00 ga qadar tashkil etadi.