Moliya vazirligi xabariga ko‘ra, davlat budjeti daromadlarining asosiy qismi soliq va bojxona tushumlari hisobiga ta'minlanmoqda. Bunda, soliqsiz daromadlarning ulushi ko‘paymoqda, bu eng avvalo davlat ulushiga hisoblangan dividendlar tushumining ko‘payishi bilan bog‘liq.

Umuman olganda, 2020 yil 1 iyul holatiga soliq tushumlari 45,9 trln. so‘mni tashkil etib, o‘tgan yil mos davriga nisbatan 6,8 trln. so‘mga (17,2 foiz) ko‘p mablag‘lar undirilgan.

Iqtisodiy faollikning pasayishi va koronavirus pandemiyasi davrida berilgan soliq imtiyozlari sababli II chorakda soliq daromadlarining pasayishiga qaramasdan jami soliq tushumlari miqdori I yarim yillikda o‘sdi, deyiladi vazirlik sharhida.