Buxorodagi 7ta madaniy meros obektini YuNeSKO ro‘yxatiga kiritish bo‘yicha hujjatlar tayyorlanmoqda

O‘zbekiston BMTning ta'lim, fan va madaniyat masalalari bo‘yicha ixtisoslashgan tashkiloti YuNeSKOga 1993 yilda a'zo bo‘lib, Umumjahon madaniy va tabiiy merosni muhofaza qilish to‘g‘risidagi konvensiya 1995 yilning 22 dekabrida O‘zbekiston Respublikasi tomonidan ratifikatsiya qilingan.

Madaniyat vazirligi xabariga ko‘ra, konvensiya doirasida Xiva shahridagi “Ichan-qal'a”, “Samarqand – madaniyatlar chorrahasi” obekti, Buxoro va Shahrisabz tarixiy markazlari hamda Chotqol biosferasi (tabiiy meros) Umumjahon merosi ro‘yxatiga kiritilgan.

Bildirilishicha, bugungi kunda Buxoro viloyatida 829 ta moddiy madaniy meros obektlari davlat muhofazasiga olingan. Shundan, 287 tasi arxeologiya yodgorliklari, 507 tasi arxitektura obektlari, 17 tasi monumental san'at hamda 18 tasi diqqatga sazovor joylar hisoblanadi.

O‘zbekiston Respublikasi Madaniyat vazirligi, YuNeSKO ishlari bo‘yicha milliy komissiya, O‘zbekiston Respublikasi Fanlar Akademiyasi bilan birgalikda Markaziy Osiyo xalqaro tadqiqotlar institutini jalb qilgan holda “Ipak yo‘li: Zarafshon daryosi va Qayroqum yo‘nalishi” (O‘zbekiston, Tojikiston va Turkmaniston) chegaralararo obidalari qatorida Buxoro viloyatida joylashgan Chor-Bakr va Bahouddin Naqshband majmualari, Vobkent minorasi va Chashmai Ayub maqbarasi arxitektura obektlari hamda qadimgi Poykent, Varaxsha va Vardonze shahar qoldiqlarini YuNeSKOning Umumjahon merosi ro‘yxatiga kiritish bo‘yicha, xalqaro mezonlarga asosida nomzodlik hujjatlari tayyorlanmoqda.