Самарқанд халқаро аэропортининг янги кўриниши китоб шаклида бўлади

Ўзбекистон 01:04 / 06.08.2020 12843

Самарқанд халқаро аэропорти 62 миллион доллар эвазига янгича кўриниш олмоқда. Бу ҳақда «Ўзбекистон 24» телеканали эфирида айтилди.

Бу борадаги лавҳада аэропортнинг макети ҳам кўрсатилган ва у китоб шаклида эканини кўриш мумкин. Инвестиция лойиҳалари асосида янгича кўриниш оладиган аэропорт соатига 600-1200 кишига хизмат кўрсата оладиган аэровокзалга эга бўлмоқда. Иншоот барча турдаги самолётларни чекловларсиз қабул қила олади.

Китоб кўринишидаги аэропортнинг том қисмида юлдузларнинг сурати бўлади ва улар тунда ҳам кўриниб туради. Туркия ва Ўзбекистон корхоналари иштирокида амалга оширилаётган қурилишга «Enter engineering» компанияси бош пудратчи сифатида кўрсатилган. Ҳозирда объектда карантин қоидаларига риоя қилган ҳолда 245 киши ишламоқда. Лавҳада ишлар график бўйича давом этаётгани ва пойдевор қисми тўлиқ қуриб битказилгани айтилди.

Самарқанд халқаро аэропорти реконструкциядан кейин йилига 1,4 миллион нафар йўловчига хизмат кўрсатиш қувватига эга бўлади. Бу эса соатига 600 кишининг келиб-кетишига имконият мавжуд бўлади дегани. Бино ёнида 730та машинага мўлжалланган замонавий тўхташ жойи қурилади. Аэропорт 2021 йилда фойдаланишга топширилиши режалаштирилган.

Маълумот учун, 2022 йилда Шанхай ҳамкорлик ташкилотининг Сессияси айнан Самарқанд шаҳрида ўтказилиши режалаштирилган. Вазирлар Маҳкамасининг «2022 йилда Самарқанд шаҳрида Шанхай ҳамкорлик ташкилотининг навбатдаги Саммитини ўтказишга тайёргарлик ишларини молиявий қўллаб-қувватлаш тўғрисида»ги қарорига кўра, ўтган йилдан бошлаб шаҳарда йўллар ҳолатини яхшилаш бўйича ишлар бошлаб юборилган ва кўплаб кўчаларда коммуникация тармоқлари янгилаб чиқилганди.

Кўпроқ янгиликлар