Трамп Байрутдаги портлашни “ҳужум” деб атади

Жаҳон 07:50 / 05.08.2020 16791

“Кўринишича, бу даҳшатли ҳужум бўлган”, деб айтган Трамп матбуот анжуманда.

“Байрутдаги катта портлашда кўплаб одамлар ҳалок бўлди, юзлаб одамлар оғир жароҳат олди. АҚШ Ливанга ёрдам беришга тайёр”, деб қўшимча қилган Трамп. 

Матбуот анжуманда АҚШ президентидан у ҳақиқатан ҳам портлашни “ҳужум” деб ўйлаши ҳақида қайта сўралганда, у америкалик генераллар билан учрашгани ва улар Байрутдаги портлашни ҳужум деб ҳисоблашаётганини маълум қилган.

“Портлаш характерига кўра, шунга ўхшайди. Мен бизнинг ажойиб генераллардан баъзилари билан учрашдим. Улар ҳам шундай деб ҳисоблашмоқда. Бу ишлаб чиқаришдаги портлашга ўхшаш нарса эмас. Уларнинг фикрича, бу ҳужум бўлган. Кўринишича, улар буни ҳужум, қандайдир бомба, деб ўйлашмоқда”, деб таъкидлаб ўтган АҚШ президенти.

Бироқ CNN телеканалининг Пентагоннинг исми ошкор қилинмаган уч амалдорига таяниб хабар беришича, АҚШ мудофаа вазирлигида Байрутдаги портлаш бирор ҳужум билан боғланганининг ҳеч қандай аломатларини кўришмаяпти.   

Телеканал манбаларидан бирининг таъкидлашича, агар портлаш ҳужум билан боғланган бўлганда АҚШнинг ҳудуддаги қўшинлари юқори тайёргарлик ҳолатига келтирилиб, мадад кучи олган бўларди. Бироқ, унинг айтишича, бундай ҳолат юз бермаяпти. 

Байрут портида 4 августда кучли портлаш юз берди. Шаҳар губернатори маълумотларига кўра, портлаш оқибатида шаҳардаги биноларнинг ярмига шикаст етган, шифохоналар эса кўп сонли жароҳатланганлар сабабли тўлиб кетган. Охирги маълумотларга кўра, воқеа оқибатида 3,7 мингдан кўпроқ киши жароҳатланган, 70 дан кўпроқ қурбон бор.  

Ливан бош вазири Ҳасан Диаб мудофаа бўйича олий кенгаш йиғилишида портлашга портда 6 йил давомида сақланган 2750 тонна аммиак селитраси сабаб бўлганини маълум қилган. Кенгаш портлаш юзасидан ўтказилган шошилинч йиғилиш натижаларига кўра, Байрутни фалокат ҳудуди деб эълон қилган. Шунингдек, кенгаш бош вазирга пойтахтда фавқулодда ҳолат эълон қилишни тавсия қилган.   

Ливан ҳукумати портлаш қурбонлари хотирасига 5 августдан мамлакатда 3 кунлик мотам эълон қилган.  

Кўпроқ янгиликлар