Самарқандликларга 47 миллиард ёрдам пули берилади. Турдимов «темир дафтар»даги оилалар ҳақида маълумот берди

Ўзбекистон 22:00 / 03.08.2020 8171

Эркинжон Турдимовнинг маълум қилишича, вилоятда «темир дафтар»га киритилган 47 минг 770та оиладан 10 мингтаси танлаб олиниб, уларга 1 миллион сўмдан бир марталик моддий ёрдам етказиб берилган. Қўшимча равишда Қурбон ҳайити арафасида маҳаллий бюджет маблағлари ва ҳомийлар томонидан шу тоифадаги 2000га яқин оилага жами 2 миллиард сўм пул тарқатилган.

Умуман, вилоят бўйича тарқатилиши белгиланган пул маблағларининг жами қиймати қарийб 47 миллиард сўмни ташкил этади.

«Шу ўринда, сиз азиз самарқандликларга яна бир нарсани таъкидлаб ўтишни хоҳлардим. Бугун ижтимоий тармоқларни кузатар эканмиз, бир миллион сўм маблағ ўрнига 500 минг сўм берилибди, 700 минг сўм берилибди ёки маҳалла раиси ўз танишига берибди, қабилида аниқ фактларсиз баён этилаётган постлар, баъзи ҳолларда видеолавҳалар ҳам жойлаштирилмоқда. 

Масалан, Facebook ижтимоий тармоғи фойдаланувчиларидан бири «Қўшниларга пул тарқатишди, 500 минг сўмдан. Лекин 1 миллион дейишганди. Маҳалла раиси эса нолиш эмас, рози бўлиш керак деб айтди» мазмунидаги пост жойлаштирилди. Мазкур постга юзга яқин самарқандликлар томонидан фикрлар билдирилди.

Ҳолат шаҳар прокуратураси ва вилоят ҳокимлиги томонидан ўрганиб чиқилди. Билдирилган ҳолат ҳақиқатга зидлиги, аниқроғи ажратилган маблағ Президент фармони доирасида эмас, балки фуқарога Қурбон ҳайити арафасида «Роҳат» маҳалласида яшовчи саховатпеша тадбиркор томонидан моддий ёрдам тарзида берилгани маълум бўлди.

Худди шунингдек, Facebook ижтимоий тармоғи яна бир фойдаланувчиси томонидан «Жомбой туманининг «Талдираззоқ» ва бошқа бир қатор маҳаллаларида ижтимоий ҳимояга муҳтож оилалар қолиб, 10 сотих томорқаси, 7 хонали уйи, «Нексия» автомобили бор, тўрт мучаси соғ оилаларга бир миллион сўмдан пул тарқатилди», мазмунида пост қўйилди. 

Ҳолат Жомбой тумани ҳокимлиги ва туман прокуратураси томонидан ўрганилганда келтирилган важлар ўз исботини топмади. Туман ҳокимлигининг маълум қилишича, «Талдираззоқ» маҳалласида 10та оилага инқирозга қарши курашиш жамғармаси маблағлари ҳисобидан 1 миллион сўмлик моддий ёрдам ажратилган. 4 нафари оғир хасталикка чалинганлар, 2 нафари ногирон фарзанд тарбиялаётганлар, 2та боқувчисини йўқотган, яъни 2та оғир ижтимоий вазиятга тушиб қолган оилага моддий ёрдам берилган.

Шунингдек, маҳалла мутасаддиларининг айтишича, муаллиф яқин қариндошлари ҳам ушбу рўйхатга киритилиш истагида мурожаат қилган. Улар белгиланган талабларга мос келмагани сабаб рад этилган», деди Эркинжон Турдимов.

Маълум бўлишича, иккала ҳолатда ҳам пост муаллифлари масъуллар иштирокида муаммони атрофлича ўрганиб чиқилишида иштирок эта олмасликларини билдиришган. Ҳолатни эса бировдан эшитиб ёзишганини айтишган.

Шунингдек, вилоят ҳокими ижтимоий тармоқларда аниқ манзил кўрсатилмаган ҳолда турли фикрлар билдирилиши ҳодисани аниқлашга тегишли идоралар қийналаётганини маълум қилган.

«Ҳайит кунлари телеграм каналларда бир миллион сўм моддий ёрдам ўрнига 700 минг сўм берилди, қабилида тарқатилган малумотда 100 минг сўмлик пулларни гилам устида санаб турган ҳолат видеоси тарқалди. Қизиқ ҳолат, мазкур видеода асл ҳолат қаерда бўлганлиги бирор бир каналларда ёзилмади. Бу эса деярли барча вилоятларда мутасаддилар томонидан мазкур ҳолатнинг ўрганилишига, қимматли вақт йўқотилишига олиб келди. 

Ижтимоий тармоқларда саҳифалар, телеграм каналлари очганлардан тармоқларга асосланган, аниқ факт ва манзили кўрсатилган маълумотларни нашр этишни, жойлаштиришни сўраган бўлардим.

Қолаверса, шаффофликни таъминлаш мақсадида бир марталик моддий ёрдам берилган фуқаролар рўйхати бугунги кунда туманлар ва шаҳарлар ҳокимликлари телеграм каналларида жойлаштириб борилмоқда. Агар кимда-ким ушбу рўйхатлардан жой олган қайсидир оилага нотўғри моддий ёрдам кўрсатилди деган эътирозлари бўлса, комментария шаклида ўз фикр-мулоҳазаларини пост остида билдиришсин, ҳар бир ҳолатни ўрганиб чиқамиз ва натижаси ҳақида кенг оммага маълумот берамиз», дея мурожаат қилди Эркинжон Турдимов.

Кўпроқ янгиликлар