Россия октябрь ойидан бошлаб коронавирусга қарши оммавий вакциналашни бошлашни режалаштираётгани ҳақидаги янгилик жаҳон ОАВлари томонидан эҳтиёткорлик билан қабул қилинди. Россия ҳокимияти шошилмоқда ва хавфсизликдан миллий нуфузни устун қўймоқда, дейишмоқда журналистлар.
Россияда коронавирусдан ҳимояловчи илк вакцина устидаги клиник синовлар ниҳоясига етганини мамлакат соғлиқни сақлаш вазири Михаил Мурашко маълум қилди. Унинг сўзларига кўра, вакцина тез орада рўйхатга олинади ва шундан сўнг, октябрь ойидан бошлаб оммавий эмлаш тадбирларини бошлаш режалаштирилган. Вазир, шунингдек, эмлаш текин бўлишини ҳам таъкидлаган.
Хорижий ОАВлар вакцина расман маъқулланиши ва ундан фойдаланиш тезлигига эътибор қаратиб, янгиликни ўта эҳтиёткорлик билан қабул қилишди.
«Россия тезлаштирилган суръатларда тайёрланган унинг потенциал вакцинасига хориждан сўровлар ёғилаётганини таъкидламоқда. Лекин кўп саволлар очиқ қолмоқда. <...> Россия вакцина синови ҳақида илмий маълумотларни эълон қилмади ва CNN унинг эълон қилинган хавфсизлиги ва самарадорлигини тасдиқлай олмайди. Танқидчиларнинг фикрича, мамлакат ўзини қудратли илм-фан давлати сифатида машҳур қилиш истагидаги Кремлнинг сиёсий босими остида вакцинадан фойдаланишни тезлаштирмоқчи.
Ҳали айрим вакциналар синовларнинг учинчи босқичини ўтаётган бир пайтда, Россия вакцинаси иккинчисини ҳам ўтаб бўлмаган. Ишлаб чиқарувчилар бу фазани 3 августгача якунлашни мўлжаллашмоқда, шундан сўнг синовларнинг учинчи фазасини тиббиёт ходимларини эмлаш билан параллел равишда ўтказишмоқчи».
«Коронавирус пандемиясининг соғлиқни сақлаш тизимига босимига ҳамда карантин чораларининг иқтисодиётга зарбасига тўқнаш келган Россия синов муддатини қисқартирди ва вакциналар пойгасида ғолиб чиқиш учун клиник баҳо бериш жараёнини тезлаштирди.
Ғарбдаги номзод вакциналар айни соатларда синовларнинг учинчи босқичини ўтаётган бир пайтда Россияда вакцинани рўйхатга олиш олдидан учинчи босқични ўтказиб юборишга қарор қилгани айримларда мамлакат миллий нуфуз учун фуқароларининг хавфсизлигини қурбон келтириши мумкинлиги борасида хавотир уйғотмоқда».
«Гарчи ишлаб чиқарувчилар вакцинани хавфсиз ва омма етишиши мумкин бўлганлари ичида биринчиси деб мақташганига қарамасдан, маълумотлар эълон қилинмади, Россия ҳаракатланаётган тезлик эса бошқа мамлакатларда савол келтириб чиқармоқда».
«COVID-19га қарши илк потенциал вакцинани тақдим этиш йўлидаги Россиянинг тезлиги танқидчиларда коронавирусга қарши биринчи муваффақиятли вакцина яратиш пойгасида Россия саломатлик ва хавфсизликни хавф остида қолдирмаяптими, деган саволлар келтириб чиқармоқда».
