Карантинга олинганларнинг фарзандларини парваришлаганларга меҳнатга лаёқатсизлик варақаси бериладими? – Адлия вазирлиги изоҳи

Ўзбекистон 13:49 / 01.08.2020 2734

Хусусан, мурожаат қилганлардан бири синглиси ва куёви карантинга олингани муносабати билан уларнинг 7 ёшли 10 ёшли фарзандларини парвариш қилаётгани, шу туфайли ишга чиқолмаётганини айтиб, ўзи учун меҳнатга лаёқатсизлик варақаси берилиши имконияти ҳақида сўраган.

«Ўзбекистон Республикаси Соғлиқни сақлаш вазирининг 2020 йил 11 майдаги «Меҳнатга лаёқатсизлик варақаларини бериш тартиби тўғрисидаги йўриқномага ўзгартиришлар киритиш ҳақида»ги 117-сон буйруғи қабул қилинган.

Мазкур буйруққа кўра уй шароитида карантинга олинган шахсларга ҳамда карантинга олинган шахсларнинг 14 ёшгача бўлган боласини парвариш қилаётган шахсларга меҳнатга лаёқатсизлик варақаси карантинда бўлган тўлиқ кунларига уларнинг яшаш жойидаги поликлиника томонидан берилади», деди вазирлик расмийси бу саволга жавобан.

Шунингдек, ўз уйини бошқа шахсга узоқ муддатга ижара шартномаси тузган ҳолда ижарага берган ва солиқларни ўз вақтида тўлаб келиши, карантин муносабати билан ижарадаги шахс ўз қишлоғидаги уйига кетишга мажбур бўлгани, ҳозирда уйи бўш тургани ва ижара тўлови олмаётганини айтиб бу ҳолатда унга нисбатан қандай солиқ имтиёзлари мавжудлиги ҳақида савол берилган.

«Карантин даврида аҳоли ва тадбиркорлик субъектларига қатор имтиёзлар берилмоқда. Президентимизнинг жорий йил 20 июлда қабул қилинган «Коронавирус пандемиясининг салбий таъсирини камайтириш учун аҳоли, тадбиркорлик субъектлари, умумий овқатланиш, савдо ва хизматлар соҳасини қўллаб-қувватлашнинг қўшимча чора-тадбирлари тўғрисида» ПФ–6029-сон Фармони қабул қилинган.

Фармонга мувофиқ, 2020 йил 1 июлдан 2020 йил 31 декабрга қадар жисмоний шахслар кўчмас мулкни ижарага беришдан олинган даромадлар бўйича жисмоний шахслардан олинадиган даромад солиғи тўлашдан озод этилган», дея жавоб қайтарган Севара Ўринбоева.

Брифинг давомида ҳеч қаерда ишламайдиган, моддий аҳволи оғир бўлган шахсга қонунчиликда ишсизларга нафақа тўлаш тартиби тўғрисида маълумот берилган.

«Меҳнат кодексига кўра ишсизлик нафақаси ишсиз деб эътироф этилган шахсга у иш қидираётган шахс сифатида маҳаллий меҳнат органида рўйхатдан ўтган кундан эътиборан тайинланади. Қарамоғида 3 нафаргача киши бўлган, 35 ёшга тўлмаган ишсиз эркакка ишсизлик нафақаси у ҳақ тўланадиган жамоат ишларида Вазирлар Маҳкамаси томонидан белгиланадиган тартибда иштирок этган тақдирда тайинланади. Ишсиз шахснинг нафақа олиш ҳуқуқи у иш қидираётган шахс сифатида рўйхатдан ўтган пайтдан бошлаб кечи билан ўн биринчи кундан эътиборан кучга киради», деган вазирлик матбуот котиби.

Кўпроқ янгиликлар