15 июлдан ихтисослаштирилган олимпия захиралари мактаб-интернатларига қабул бошланади

Спорт 15:26 / 15.07.2020 4940

Қабул жараёнлари коронавирус инфекцияси билан боғлиқ пандемия шароитида санитария-гигиена қоидаларига қатъий риоя қилинган ҳолда ташкил этилиб, касбий (ижодий) имтиҳонларнинг адолатли ва шаффоф ўтказилишини таъминлашга алоҳида эътибор қаратилади.

Ўқувчиларга қулайлик яратиш мақсадида, мактаб-интернатда ўқиш истагида бўлган ўқувчиларнинг ҳужжатлари жорий йил 15 июлдан 15 августга қадар (шу куни ҳам) ихтисослаштирилган олимпия захиралари мактаб-интернатлари ҳамда республикамизда мавжуд туман (шаҳар) жисмоний тарбия ва спорт бўлимларида қабул қилинади.

Шунингдек, аҳолига қулайлик яратиш мақсадида буйруқ чиққан кундан бошлаб уч кун муддатда туман (шаҳар) жисмоний тарбия ва спорт бўлимлари ҳамда ихтисослаштирилган олимпия захиралари мактаб-интернатлари биносида мактаб-интернатда ўқиш истагида бўлган ўқувчилар ва уларнинг ота-оналарини қизиқтирган саволларга жавоб бериш учун ҳафтанинг душанба-шанба кунлари соат 9:00дан 18:00гача (жорий йил 1 сентябргача бўлган муддатда) ишлайдиган мурожаатлар маркази (колл-марказ) фаолияти ташкил этилади.

Ихтисослаштирилган олимпия захиралари мактаб-интернатларига 2020/21 ўқув йили учун касбий (ижодий) имтиҳонлар жорий йил 20 августдан 30 августга қадар ўтказилади.

Эслатиб ўтамиз, ихтисослаштирилган олимпия захиралари мактаб-интернатларига 6-синфни тугатиб, 7-синфга ўтган спортчи ёшлар қабул қилинади.

Мурожаат учун телефон:

(71) 239-24-14

(99) 886-84-00

Жисмоний тарбия ва спорт вазирлиги Матбуот хизмати

Кўпроқ янгиликлар