Барбадос ороли масофадан ишлаётганларга махсус визани таклиф қилди

Жаҳон 00:41 / 12.07.2020 2685

CNBC хабарига кўра, митти давлат яқин орада ўз чегараларини очади ва масофадан ишлаётган хорижликларга янги дастурни таклиф қилади.

Бош вазир Мия Моттлининг сўзларига кўра, ҳукумат бундай сайёҳларга 12 ой давомида мамлакат ҳудудида қолишга рухсат бермоқчи.

«Бу ерга келиш ва бир неча ой ишлаш имкониятига эга бўлсангиз, Европа, АҚШ ёки Лотин Америкасида қолиб, меҳнат қилишингиз шарт эмас», — деб баёнот берди бош вазир.

У янги дастур одамларга уйини, иш жойини тарк этиб, хорижда ишлаш имконини беришини қўшимча қилди. Сайёҳларни жалб қилиш учун давлат уларга «олий тоифадаги» хизматларни таклиф қилиши лозим, Барбадос эса бунга қодир, деб ҳисобламоқда Моттли.

Барбадос меҳмонхоналари ва туризм ассоциацияси маълумотига кўра, туризм соҳаси давлат ялпи ички маҳсулотининг бевосита 12 фоизини, билвосита эса 40 фоизини ташкил қилади. Бундан ташқари, туризм хусусий сектордаги энг кўп ишчи ўринларига эга соҳадир.

Жонс Ҳопкинс университети маълумотига кўра, Барбадосда 98 кишида коронавирус инфекцияси аниқланган. Улардан 7 нафари вафот этган.

Ҳозирги вақтда ҳукумат баъзи чекловларни олиб ташлаган, жумладан комендантлик соати бекор қилинган. Аммо мамлакатда ижтимоий масофани сақлаш қоидасига амал қилиш талаби сақланиб турибди.

Шу билан бирга, 500 кишигача бўлган оммавий тадбирларни ўтказишга рухсат берилган. Спорт мусобақалари пайтида мухлислар ҳам иштирок этиши мумкин.

Барбадос 12 июлдан бошлаб чегараларни очишни режалаштирмоқда.

Кўпроқ янгиликлар