Карантинда йирик қурилишлар тўхтатилмаётгани бу борада «катта тажриба тўплангани» билан изоҳланди

Ўзбекистон 16:07 / 08.07.2020 10871

Куни кеча Соғлиқни сақлаш вазири Алишер Шодмонов коронавирусга чалиниш ҳолатлари айниқса бозорлар ва қурилиш объектларида кўп кузатилаётганини айтган эди. Аммо Махсус комиссиянинг 8 июлда эълон қилинган қарори билан, кўплаб объектлар қаторида буюм бозорлари ҳам ёпилиши, аммо йирик қурилиш ташкилотлари фаолиятини давом эттириши мумкинлиги белгиланди.

Соғлиқни сақлаш вазирлиги ҳузуридаги коронавирусга қарши кураш штаби аъзоси Ҳабибулла Оқилов 8 июль кунги матбуот анжуманида Kun.uz мухбири саволига жавобан ушбу масалада изоҳ берди.

«Карантин даврида анча тажриба тўпладик. Қурилишларни тўхтатмаётганимиз боиси – биз карантин шароитида қурилиш ишларини ташкил этишни ўргандик.

Ҳозир Санитария-эпидемиологик осойишталик агентлиги билан келишган ҳолда, қурилиш бўлаётган жойларда санитария-эпидемиология қоидаларига риоя қилган ҳолда ишни ташкил қилиш мумкинми, ишчиларнинг ижтимоий масофа сақлашини таъминлаш мумкинми, овқатланиш шароити қанақа, идиш-товоғи қанақа (бир марта ишлатиладиганми, агар кўп марта ишлатилса, 70 градусдан ортиқ иссиқликдаги сувда ювиш имкони борми), ҳожатхонаси қанақа аҳволда – шуларнинг ҳаммаси талабга жавоб берса, қурилиш объектларининг ишлашига рухсат берилади, деб комиссия хулосасида ёзилган», – деди Оқилов.

Эслатиб ўтамиз, сўнгги бир ой ичида қурилиш ташкилотларида 200дан ортиқ кишида коронавирус аниқланган. Қурилиш олиб борилаётган объектлар ҳудуди тўлиқ карантинга олиниши белгиланган.

Кўпроқ янгиликлар