Kuni kecha Sog‘liqni saqlash vaziri Alisher Shodmonov koronavirusga chalinish holatlari ayniqsa bozorlar va qurilish obektlarida ko‘p kuzatilayotganini aytgan edi. Ammo Maxsus komissiyaning 8 iyulda e'lon qilingan qarori bilan, ko‘plab obektlar qatorida buyum bozorlari ham yopilishi, ammo yirik qurilish tashkilotlari faoliyatini davom ettirishi mumkinligi belgilandi.

Sog‘liqni saqlash vazirligi huzuridagi koronavirusga qarshi kurash shtabi a'zosi Habibulla Oqilov 8 iyul kungi matbuot anjumanida Kun.uz muxbiri savoliga javoban ushbu masalada izoh berdi.

«Karantin davrida ancha tajriba to‘pladik. Qurilishlarni to‘xtatmayotganimiz boisi – biz karantin sharoitida qurilish ishlarini tashkil etishni o‘rgandik.

Hozir Sanitariya-epidemiologik osoyishtalik agentligi bilan kelishgan holda, qurilish bo‘layotgan joylarda sanitariya-epidemiologiya qoidalariga rioya qilgan holda ishni tashkil qilish mumkinmi, ishchilarning ijtimoiy masofa saqlashini ta'minlash mumkinmi, ovqatlanish sharoiti qanaqa, idish-tovog‘i qanaqa (bir marta ishlatiladiganmi, agar ko‘p marta ishlatilsa, 70 gradusdan ortiq issiqlikdagi suvda yuvish imkoni bormi), hojatxonasi qanaqa ahvolda – shularning hammasi talabga javob bersa, qurilish obektlarining ishlashiga ruxsat beriladi, deb komissiya xulosasida yozilgan», – dedi Oqilov.

Eslatib o‘tamiz, so‘nggi bir oy ichida qurilish tashkilotlarida 200dan ortiq kishida koronavirus aniqlangan. Qurilish olib borilayotgan obektlar hududi to‘liq karantinga olinishi belgilangan.