Олимлар Месси ва Роналдуни таққослаб ким кучлироқ эканлигини аниқлашди

Спорт 14:47 / 11.06.2020 23699

Нидерландиянинг SciSports информацион компанияси Бельгиянинг Левен Университети олимлари ҳамкорлигида «Барселона» ҳужумчиси Лионель Месси ва «Ювентус» форварди Криштиану Роналдунинг ўйин сифатлари устида тадқиқот ўтказишди, дея хабар бермоқда Sport.es нашри.

Олиб борилган таҳлил натижасига кўра, аргентиналик 32 ёшли голеадор португалиялик 35 ёшли тўпурардан майдонда икки баробар кучлироқ эканлиги ойдинлашган. Изланишлар футболчиларнинг ҳаракатлари самарадорлиги ва ҳар томонлама ўйин жиҳатлари устидан олиб борилган. 

Хусусан, футболчиларнинг ўйин давомидаги барча ҳаракатлари ва учрашув натижасига таъсири алоҳида баҳоланган. Мессининг натижаси 1,21 баллни ташкил этган бўлса, Роналдуники 0,61 баллни ташкил қилган. Тадқиқотлар шуни кўрсатдики, Месси Роналдудан кўра тўп билан кўпроқ ҳаракат қилиб, кўпроқ вазиятлар яратади ҳамда ўйин натижасига ҳам кўпроқ таъсир ўтказади.

Маълумот учун, Месси жорий мавсумда 28 ўйинда 21та гол урган бўлса, Роналду 29 ўйинда 23та голга муаллифлик қилган.

Кўпроқ янгиликлар