Мактабларда дарслар янги ўқув йилида ҳам онлайн режимида давом эттирилиши мумкин

Ўзбекистон 13:47 / 04.06.2020 2797

Вазирлар Маҳкамасининг “Халқ таълими тизимида онлайн таълим бериш фаолиятини янада такомиллаштириш тўғрисида”ги қарори лойиҳаси эълон қилинди.

Ўзбекистон Республикаси Халқ таълими вазирлиги, Ахборот технологиялари ва коммуникацияларини ривожлантириш вазирлиги ва Ўзбекистон Миллий телерадиокомпаниясининг коронавирус пандемияси даврида телевизион видеодарслар намойиш этилган телеканаллардан халқ таълими тизимида масофавий таълимни ривожлантириш мақсадларида фойдаланиш тартибини сақлаб қолиш тўғрисидаги таклифига розилик берилади.

Белгилаб қўйилишича:

коронавирус пандемияси даврида телевизион видеодарслар намойиш этилган учта телеканалдан “online-maktab” лойиҳасини давом эттириш мақсадида фойдаланилади ва янада такомиллаштирилади;

телевизион видеодарс ва видеомашғулотларни доимий тасвирга олишни ташкил этиш учун “O‘zbekiston MTRK Mediamarkazi” биносида махсус телестудия ажратилади ва техник талаблар асосида жиҳозланади;

“online-maktab” лойиҳаси доирасида 2020 йил 1 августдан бошлаб, 2020/2021 ўқув йили учун телевизион видеодарсларни тасвирга олиш йўлга қўйилади;

“online-maktab” лойиҳаси доирасида телевизион видеодарслар ҳар ўқув йили давомида эфирда намойиш этиб борилади;

телевизион видеодарслар Вазирлик томонидан тақдим этиладиган дарс жадваллари асосида Ўзбекистон Миллий телерадиокомпанияси томонидан белгиланадиган телеканаллар орқали намойиш этиб борилади;

лойиҳаларга жалб этиладиган ўқитувчиларга ҳар бир телевизион видеодарс ва видеомашғулотлар учун (асосий иш ҳақидан ташқари) базавий ҳисоблаш миқдорининг 25 фоизи миқдорида, муҳаррир ва сурдопедагогларга ҳар бир ишлаган куни учун базавий ҳисоблаш миқдорининг 50 фоизи миқдорида қўшимча ҳақ тўланади;

“online-maktab” лойиҳасини амалга ошириш билан боғлиқ харажатлар Халқ таълими соҳасидаги ислоҳотларга кўмаклашиш жамғармасининг тизимни рақамлаштиришга йўналтирилиши режалаштирилган маблағлар ҳисобидан қопланади.

Қуйидагилар “online-maktab” лойиҳасининг асосий вазифалари этиб белгиланади:

умумий ўрта таълим тизимида масофавий ўқитиш тизимини такомиллаштириш;

телевизион видеодарслар тайёрлаш бўйича илғор халқаро тажрибалардан фойдаланиш;

умумий ўрта таълим тизимига ахборот-коммуникация технологияларини кенг жорий этиш;

ўқувчилар ва ўқитувчиларни халқаро баҳолаш дастурлари ва тадқиқотларга (PISA - 15 ёшли ўқувчиларнинг ўқиш, математика ва табиий йўналишдаги фанлардан саводхонлик даражасини баҳолаш, PIRLS - бошланғич 4-синф ўқувчиларининг матнни ўқиш ва тушуниш даражасини баҳолаш, TIMSS – 4 ва 8-синф ўқувчиларининг математика ва табиий йўналишдаги фанлардан ўзлаштириш даражасини баҳолаш, TALIS - раҳбар ва педагог кадрларнинг умумий ўрта таълим муассасаларида ўқитиш ва таълим олиш муҳитини ҳамда ўқитувчиларнинг иш шароитларини ўрганиш ва бошқа) тайёргарлигини кучайтириш;

барча умумтаълим фанлари, биринчи навбатда STEAM (илм-фан, технология, муҳандислик, санъат ва математика) фанларининг ўқитиш сифатини ошириш;

ўқувчиларда ижодий ва танқидий фикрлаш, ахборотларни таҳлил қилиш, етакчилик, коммуникативлик, ҳамкорликда ишлаш, муаммоларни ечиш каби XXI аср кўникмаларини шакллантириш ва ривожлантириш;

ўқувчиларга ўқув материалларини чуқур ўрганишга ва такрорлашга имконият яратиш;

босқичма-босқич фанлар ва синфлар кесимида барча мавзулар бўйича видеодарслар базасини яратиш;

етакчи умумий ўрта таълим муассасалари, олий ўқув юртлари ва бошқа таълим муассасаларининг илмий ва методик салоҳиятларидан фойдаланиш орқали таълим бериш сифатини ошириш.

Белгилаб қўйилишича, мамлакатимиздаги эпидемиологик вазият оғирлашиб, карантин қоидалари кучайтирилган тақдирда “online-maktab” рукни остида телевизион видеодарсларни тасвирга олиш жараёни Республика махсус комиссия томонидан белгиланадиган тартибда амалга оширилади.

“Online-maktab” лойиҳаси доирасида дарсларни тасвирга олишда қуйидагиларга алоҳида эътибор қаратилади:

ўқувчилар томонидан ўзлаштириши мураккаб бўлган мавзуларни кенгроқ очиб бериш;

амалий машғулотлар ва виртуал лабораторияларни намойиш қилиш;

дарслик ва ўқув дастурларига қўшимча тарзда қизиқарли ва фойдали маълумотларни бериб бориш;

ўқувчиларни касб-ҳунарга йўналтириш;

ўқитувчилар томонидан илғор хорижий педагогик ва ахборот-коммуникация технологияларидан самарали фойдаланишни ташкил этиш;

телевизион видеодарсларни ўзбек, рус ва айрим фанлардан инглиз тилида намойиш қилинишини ташкил этиш чораларини кўриш.

Ўзбекистон Республикаси Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги “online-maktab” лойиҳаси машғулотларини, хусусан илғор хорижий тажрибалар асосида STEAM фанларини ўқитиш ва инглиз тилидаги дарс машғулотларини тайёрлаш бўйича Вазирлик билан ҳамкорликни йўлга қўяди.

Кўпроқ янгиликлар