“Ҳар битта тест ўтказиш муассасасига кириш жойларида дезинфекцияловчи махсус тунел ўрнатилади. Бу ерда пирометр орқали ҳар бир тест топширувчининг иситмаси ўлчанади. 

Абитуриентлар тест синовларига тиббий ниқоб ва қўлқопларда келиши керак. У ерда ўзларининг ниқоб ва қўлқопларини ечишади, уларга янгилари берилади. Бунинг учун ҳар битта тест ўтказиш муассасасида етарлича захира шакллантирилади. 

Абитуриентлар қўлқопни кийишдан олдин ва кийганидан кейин ҳам қўлларини дезинфекция қилишади. Шундан кейингина улар тест синовларига киритилади. 

Тест топширувчилар оралиқ масофани сақлаши шарт. Уларнинг орасидаги масофа 2 метрдан кам бўлмаслиги керак. Абитуриентлар мазкур талабга қатъий амал қилишлари шарт. 

Тест синовлари ўтказиладиган муассасалар синовлар бошланишидан аввал, қолаверса, сменалар ўрин алмашаётган вақтда махсус воситалар билан дезинфекция қилинади. Бунинг учун етарлича захира яратилади. Дезинфекциялаш ишлари абитуриентларнинг саломатлигига таъсир қилмаслиги учун сменалар орасидаги танаффус икки соат этиб белгиланади. Бунда тест топшириладиган хонани синовлар бошлангунга қадар етарлича шамоллатишга улгурилади”, дея Соғлиқни сақлаш вазирининг биринчи ўринбосари – вазирлик ҳузуридаги санитария-эпидемиологик осойишталик агентлиги директори Баҳодир Юсупалиевнинг сўзларини келтирмоқда Kun.uz мухбири.

Юсупалиевнинг қайд этишича, тест синовларига жалб этилган барча ходимлар тиббий ниқоб ва қўлқопларда бўлиши шарт. Шунингдек, у тест ўтказиладиган 64 та муассасада тиббий пунктлар ташкил этилиши ва уларга малакали ходимлар, тез ёрдам машиналари бириктирилишини маълум қилди. 

“Абитуриентларнинг ота-оналари, яқинлари имтиҳон жараёнини кузатиш учун келмасликлари, битта жойда тўпланмасликларини илтимос қилардик. Бу карантин талабларига зид. Фарзанди, яқинларига далда бўлиш учун одамларнинг кўпчилик бўлиб битта жойга тўпланиши инфекция тарқалишига сабаб бўлиши мумкин”, дейди Баҳодир Юсупалиев.