Sessiyada xalq deputatlari tuman Kengashi deputatlari, So‘x tumani hokimi o‘rinbosarlari, tumandagi davlat va jamoat tashkilotlari rahbarlari, Farg‘ona viloyati hokimining o‘rinbosarlari, viloyat boshqarma va tashkilotlar rahbarlari, viloyat huquq-tartibot idoralari rahbarlari, shuningdek, O‘zbekiston Respublikasi Prezidenti Administratsiyasi mas'ullari, Bosh vazir o‘rinbosarlari, respublika vazirlik va idora rahbarlari hamda ommaviy axborot vositalari vakillari ishtirok etdi.
Shuningdek, sessiya ishida O‘zbekiston Respublikasi Bosh vaziri Abdulla Aripov ham ishtirok etdi va ma'ruza qildi.
«Avvalambor siz hurmatli So‘x tumani faollariga, sizlarning timsolingizda butun So‘x ahliga muhtaram prezidentimiz, hurmatli Shavkat Miromonovich Mirziyoyevning chuqur hurmat va ehtiromlarini yetkazaman.
Albatta, bir necha kun oldin chegara hududidagi bo‘lgan noxush holat ko‘p narsalarni qaytadan ko‘rib, qaytadan qarashga hammamizni majbur qildi. Bevosita prezidentimizning topshiriqlari bilan men boshchiligimda vaziyatni o‘rganish uchun mutasaddi idoralar rahbarlari yetib kelishdi.
Birinchi navbatda viloyat rahbari Shuhrat G‘aniyev va boshqa rahbarlar yetib kelib vaziyat chuqurlashishiga yo‘l qo‘ymagan. Tinchlikning qadriga yetish bu juda katta baxt. Muhtaram prezidentimizning chegaradosh hududlar bilan olib borayotgan yaxshi qo‘shnichilik siyosatlarini butun jahon e'tirof etib turibdi», degan Abdulla Aripov.
O‘zbekiston bosh vaziri So‘x tumani obod bo‘lishi uchun barcha ishlar amalga oshirilishini ta'kidlagan.
«Bizning oldimizda eng katta mas'uliyat turibdi – bu So‘x tumanidagi muammolarni hal etish va bevosita prezidentimizning e'tiborlari asosida tumanni obod qilish. Buning uchun davlatimiz tomonidan barcha imkoniyatlar va sharoitlar yaratib beriladi. So‘x tumanini ijtimoiy-iqtisodiy rivojlantirish bo‘yicha davlat rahbarining qarorlari ham chiqqan va shu asosda tumanda tizimli ishlar olib borilishi lozim. Bu ishlarda saylanadigan yangi tuman hokimidan katta mas'uliyat talab etiladi», degan u.
Shundan so‘ng 2019 yildan buyon tuman ichki ishlar bo‘limi boshlig‘i vazifasida ishlab kelayotgan Sayidbahrom Sayidmusayev So‘x tumani hokimi etib tayinlandi.
Sessiya davomida hokimning o‘rinbosarlari ham tayinlangan.
Sessiya kun tartibiga qo‘yilgan masala yuzasidan Xalq deputatlari So‘x tuman Kengashining deputatlari, hokim o‘rinbosarlari, masalalarga daxldor bo‘lgan mutasaddi idoralar rahbarlari o‘z fikr-mulohazalarini bildirgan.
