Маиший ва қурилиш чиқиндилари билан боғлиқ ишларни бошқариш тизими такомиллаштирилади - Президент қарори лойиҳаси

Ўзбекистон 11:33 / 28.05.2020 2323

Президентнинг “Маиший ва қурилиш чиқиндилари билан боғлиқ ишларни бошқариш тизимини янада такомиллаштириш чора-тадбирлари тўғрисида”ги қарори лойиҳаси эълон қилинди.

Қайд этилишича, Ўзбекистон Республикаси ҳудудида:

Ўзбекистон Республикаси Президентининг “Ўзметкомбинат” АЖ бошқаруви тизимини янада такомиллаштириш чора-тадбирлар тўғрисида” 2017 йил 15 сентябрдаги ПҚ-3277-сон қарорига мувофиқ – “Ўзметкомбинат” АЖ Ўзбекистон Республикаси ҳудудида қора металл парчалари ва чиқиндиларини тайёрлаш (харид қилиш) бўйича ягона ваколатли орган ҳисобланади;

Ўзбекистон Республикаси Вазирлар Маҳкамасининг “Рангли металл парчалари ва чиқиндиларини тўплаш, топшириш ҳамда қайта ишлаш тизимини такомиллаштириш чора-тадбирлари тўғрисида” 2017 йил 18 октябрдаги 849-сон қарорига мувофиқ – рангли металл парчалари ва чиқиндиларини тайёрлашни фақат “Ўзиккиламчиранглиметалл” АЖ амалга оширади.

Белгиланишича:

Ўзбекистон Республикаси ҳудудида иккиламчи хом ашёни тайёрлаш (металл парчалари ва чиқиндиларини сотиб олишдан ташқари) фақат маиший чиқиндилар билан боғлиқ ишларни амалга ошириш соҳасида хизмат кўрсатишга ихтисослашган ташкилотлар томонидан, уларга хизмат кўрсатиш учун белгиланган тартибда маҳаллий давлат ҳокимияти органлари томонидан бириктириб берилган ҳудуд доирасида амалга оширилади;

маиший чиқиндилар билан боғлиқ ишларни амалга ошириш соҳасида хизмат кўрсатишга ихтисослашган ташкилотлар учун фойда солиғи ставкасини бўшаётган маблағларни уларнинг моддий-техника базасини мустаҳкамлашга мақсадли йўналтириш шарти билан 50 фоизига камайтирилади;

маиший чиқиндилар билан боғлиқ ишларни комплекс амалга ошириш кластерларини ташкил қилиш бўйича лойиҳаларни амалга ошириш доирасида сотиб олинадиган махсус техникалар, технологик ускуналар, эҳтиёт қисмлар ва бутловчи буюмлар учун тижорат банклари томонидан (миллий валютада) ажратиладиган кредитлар Марказий банкнинг қайта молиялаштириш ставкасининг 50 фоизи миқдоридаги имтиёзли фоиз ставкаларида берилади. Бунда ажратиладиган кредитлар муддати 10 йил ва асосий қарз бўйича имтиёзли давр камида 2 йил этиб белгиланади;

маиший чиқиндилар билан боғлиқ ишларни амалга ошириш соҳасида хизмат кўрсатишга ихтисослашган ташкилотлар учун Тадбиркорлик фаолиятини қўллаб-қувватлаш давлат жамғармаси томонидан Марказий банк асосий ставкасининг 1,75 бараваридан ошмаган миқдордаги фоиз ставкаси билан миллий валютада бериладиган кредитлар бўйича 8 фоизли пункт миқдорида фоиз харажатларини қоплаш учун компенсация бериш механизми жорий этилади.

Иккиламчи хом ашёни тайёрлаш, шунингдек, қабул қилиш шохобчаларини ташкиллаштириш ва фойдаланиш қоидалари тасдиқланади.

Ўзбекистон Республикаси Ички ишлар вазирлиги Қорақалпоғистон Республикаси Вазирлар Кенгаши, вилоятлар, шаҳар ва туманлар ҳокимликлари, Ўзбекистон Республикаси Экология ва атроф муҳитни муҳофаза қилиш давлат қўмитаси, Ўзбекистон Республикаси транспорт вазирлиги ва Ўзбекистон Республикаси Давлат солиқ қўмитаси билан биргаликда иккиламчи хом ашёни тайёрлаш, реализация қилиш ва ташиш билан боғлиқ ноқонуний фаолиятга чек қўйиш чораларини кўради.

Ўзбекистон Республикаси Транспорт вазирлиги Ички ишлар вазирлиги ва Давлат экология қўмитаси билан биргаликда маиший чиқиндиларни тўплаш шохобчаларига кириш йўли ёки уларга туташ ҳудудларда транспорт воситаларининг тўхтаб туришини тақиқловчи йўл белгиларининг белгиланган тартибда ўрнатилишини таъминлайди.

Давлат экология қўмитаси, Ўзбекистон Республикаси Молия вазирлиги ҳузуридаги Давлат-хусусий шерикликни ривожлантириш агентлиги ва Давлат активларини бошқариш агентлигининг давлат-хусусий шериклик лойиҳалари доирасида маиший чиқиндиларни тўплаш ва олиб чиқиб кетиш бўйича хизматларни ташкил этиш учун давлат мулки ҳисобланган транспорт воситаларини бўлиб тўлаш тартибида сотиб олиш шарти билан истисно тариқасида хусусий шерикка бериш тўғрисидаги таклифига розилик берилади.

Бунда, давлат мулкини сотишдан келиб тушган маблағлар Давлат экология қўмитаси ҳузуридаги Санитар тозалаш бўйича ихтисослаштирилган корхоналар республика бирлашмасининг махсус банк ҳисоб рақамида жамланади ва хусусий шерикка ўтказиб берилган давлат мулки ўрнини тиклашга (транспорт воситалари сотиб олишга) йўналтирилади.   

Давлат экология қўмитаси:

а) Ўзбекистон Республикаси Молия вазирлиги ҳузуридаги Давлат-хусусий шерикликни ривожлантириш агентлиги Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда:

давлат-хусусий шериклик лойиҳалари доирасида маиший чиқиндиларни тўплаш ва олиб чиқиб кетиш бўйича хизматларни ташкил этиш учун ҳудудларни бериш имкониятини ўрганиб чиқади;

мазкур соҳада давлат-хусусий шерикликни босқичма-босқич жорий этилишини таъминлайди.

б) икки ой муддатда қуйидагиларни назарда тутувчи “Ўзбекистон Республикасининг Маъмурий жавобгарлик тўғрисидаги Кодексига ўзгартиш ва қўшимчалар киритиш тўғрисида”ги Ўзбекистон Республикасининг Қонуни лойиҳасини Ўзбекистон Республикаси Вазирлар Маҳкамасига киритади:

чиқиндилар билан боғлиқ ишларни амалга ошириш соҳасидаги қонунчиликни бузганлик учун жарима санкциялари миқдорини ошириш;

ҳуқуқбузарликни содир этиш қуроллари ва ашёларини мусодара қилиш чорасини киритишни назарда тутиб, фуқаролар ва мансабдор шахсларнинг жавобгарлигини кучайтириш;

иккиламчи хом ашёни тайёрлаш ва ташиш, шунингдек, қабул қилиш шохобчаларини ташкиллаштириш ва фойдаланиш қоидаларини бузганлик учун жавобгарликни белгилаш;

чиқиндиларни тўплаш ва олиб чиқиб кетилишини, шунингдек, жойлаштирилишини ўз кучи билан ёки ушбу хизматлардан фойдаланиш учун ихтисослашган ташкилотлар билан белгиланган тартибда шартнома тузиш орқали ташкиллаштирмаганлик учун мансабдор шахсларга нисбатан жавобгарликни белгилаш;

в) тадбиркорлик субъектлари ва аҳоли ўртасида иккиламчи хом ашёни тайёрлаш, қабул қилиш шохобчаларини ташкиллаштириш ва фойдаланиш қоидалари, шунингдек, иккиламчи хом ашёни ноқонуний тайёрлаш учун жавобгарлик чоралари ҳақида профилактика ишларини ўтказиш бўйича чора-тадбирларни кучайтиради;

г) Атроф муҳит ва табиатни муҳофаза қилиш технологиялари илмий-тадқиқот институтида чиқиндилар билан боғлиқ ишларни амалга ошириш соҳасида амалий илмий-тадқиқот ишларини олиб бориш ва меъёрий ҳужжатлар ишлаб чиқишга йўналтирилган бўлинма, шунингдек, Санитар тозалаш бўйича ихтисослаштирилган корхоналар республика бирлашмасида Давлат-хусусий шерикликни жорий этиш бўлими ташкил этилишини ҳамда малакали соҳа мутахассислари билан тўлдирилишини таъминлайди.

Туман ва шаҳар ҳудудларини тадбиркорлик субъектларига бириктириш, ўрнатилган тартибда тузилган давлат-хусусий шериклик тўғрисидаги битимларга мувофиқ, тадбиркорлик субъекти – хусусий шерик мурожаат қилганидан сўнг 10 иш кунидан кечикмай маҳаллий давлат ҳокимияти органларининг тегишли қарорлари билан амалга оширилади.

 

Ўзбекистон Республикаси Энергетика вазирлиги Иқтисодий тараққиёт ва камбағалликни қисқартириш вазирлиги, Молия вазирлиги билан биргаликда икки ой муддатда хорижий тажрибани ҳисобга олган ҳолда муқобил ва қайта тикланувчи энергия манбаларидан ишлаб чиқариладиган электр энергиясини ягона электр энергетика тизимига етказиб беришда ҳисоб-китоб қилиш учун “яшил” тариф тизимини жорий этиш тартиби лойиҳасини Вазирлар Маҳкамасига киритади.

 

Қорақалпоғистон Республикаси Вазирлар Кенгаши, вилоятлар, шаҳар ва туманлар ҳокимликлари Ўзбекистон Республикаси Ер ресурслари, геодезия, картография ва давлат кадастри давлат қўмитаси, Қурилиш вазирлиги, Молия вазирлиги ва Давлат экология қўмитаси билан биргаликда:

бир ой муддатда қурилиш чиқинди полигонларини ташкил этиш учун белгиланган тартибда ер майдонлари ажратилишини;

уч ой муддатда ажратилган ер майдонларида қурилиш чиқинди полигонларининг қурилиш харажатларини маҳаллий бюджет маблағлари ҳисобидан молиялаштириш, лойиҳалаштириш ҳамда қуриш чора-тадбирларини кўради.

Шундай тартиб жорий қилинадики, унга мувофиқ:

кўп квартирали турар жой секторларини қуриш бўйича лойиҳа-смета ҳужжатлари параметрларида ушбу объектлар ҳудудида чиқиндиларни тўплаш шохобчаларини ташкил этиш бўйича тадбирлар мажбурий тартибда назарда тутилади;

янги қурилган кўп квартирали турар жой секторлари ҳудудида чиқиндиларни тўплаш шохобчаларини ташкил этмай туриб фойдаланишга қабул қилиш тақиқланади;

қурилиш объектларини фойдаланишга қабул қилиш далолатномалари лойиҳалари Давлат экология қўмитасининг ҳудудий органлари билан келишилади. Бунда мазкур қурилиш объектида ҳосил бўлган чиқиндиларини экологик норматив ҳужжат талабларига мувофиқ олиб чиқиб кетилганлиги, утилизация қилинганлиги, кўмилганлиги ёки реализация қилинганлигини тасдиқловчи ҳужжатларнинг мавжуд эмаслиги далолатнома лойиҳасини тайёрлаш ёки келишишни рад этиш учун асос бўлади.

Ўзбекистон Республикаси Молия вазирлиги:

Қорақалпоғистон Республикаси Вазирлар Кенгаши, вилоятлар, шаҳар ва туманлар ҳокимликлари билан биргаликда икки ой муддатда барча бюджет ташкилотларининг 2020 йилга тасдиқланган харажатлар сметаларини қайта кўриб чиқиш ҳамда маиший чиқиндиларни тўплаш ва олиб чиқиб кетиш бўйича коммунал хизматларни тўлаш ва чиқинди контейнерлари харид қилиш учун бюджет маблағлари ажратилишини таъминлаш чораларини кўради;

2021 йилдан бошлаб ҳар йили Қорақалпоғистон Республикаси бюджети, вилоятлар ва Тошкент шаҳрининг маҳаллий бюджетлари параметрларини шакллантиришда маиший чиқиндиларни тўплаш ва олиб чиқиб кетиш бўйича коммунал тўловлар учун зарур маблағларни молиялаштириш учун маблағларни назарда тутади.

Кўпроқ янгиликлар