Саудия Арабистони байрам кунларини карантинда ўтказади

Жаҳон 22:40 / 23.05.2020 13524

Мамлакатда айни пайтда вирусга чалиниш ҳолатлари сони 70 мингдан ошди. Вирус туфайли вафот этганлар эса 379 нафарни ташкил қилмоқда. 

Чекловлар юмшатила бошланганди, бироқ…

Таъкидлаш жоизки, Саудия Арабистони апрель ойи охирида чекловларни енгиллаштира бошлаганди. Бу эса ўз навбатида корхоналарни қайта очиш ва эркин ҳаракатланишга имкон берганди. Бироқ вазият ёмонлашиб бориши ортидан ҳукумат май ойи бошида бешдан ортиқ киши бир жойда йиғилмаслигини  ва ижтимоий масофа қоидаларини назорат қилиш учун янги махсус полиция бўлинмасини жорий этди.

Ушбу мамлакат айни кунга қадар коронавирус «ўтмиш»ини қандай яшади?

Чекловлар

Фото: Arab News

Мазкур мамлакатда вирусдан зарарланиш билан боғлиқ илк ҳолат 2 март куни Баҳрайн орқали Эрондан қайтган фуқарода аниқланганди. Вақт ўтиши билан эпидемия кўлами шиддат билан кенгайиб борди. Коронавирусга қарши кураш доирасида 5 март куни Буюк жоме стерилизациялаш мақсадида вақтинча ёпилди ва исломий муқаддас қадамжолар хавфсизлиги бўйича қўшимча эҳтиёт чоралари кўрилди. 8 март куни Қатиф губернаторлиги ҳудуди ва ундан ташқарида барча транспорт вақтинча тўхтатилиши (чунки мамлакатда тасдиқланган барча ҳолатлар Қатиф ҳудудига тўғри келмоқда) маълум қилинди.

19 март куни эса коронавирус ёйилиши олдини олиш мақсадида Макка ва Мадинадаги икки масжиднинг ички ва ташқи қисмида кундалик ва жума намозларини ўқишга чеклов жорий этилди. Айни чеклов мамлакатнинг барча ҳудудлари учун ҳам тааллуқли экани айтилди. 20 март куни Ички ишлар вазирлиги барча ички рейслар, поездлар, автобуслар ва таксилар фаолияти 14 кунга тўхтатилганини маълум қилди.

24 март куни эрталаб соат 6:00 дан кечки соат 7:00гача бутун мамлакат бўйлаб комендантлик соати жорий этилди.

29 март куни подшоҳ Салмон вирусга чалинганларнинг барчасини виза ёки иқама (яшаш ҳуқуқи) билан боғлиқ мақомидан қатъи назар бепул даволашни буюрди.

New York Times газетаси 8 апрель куни Саудия подшоҳлик хонадонининг 150 нафар аъзосида коронавирус тести ижобий чиққани ҳақида хабар тарқатди. Подшоҳнинг жияни Файсал ибн Бандар Ол Сауд жонлантириш бўлимига ўтказилгани айтилди.

Спорт мусобақалари

7 март куни Саудия Арабистони Бош спорт идораси барча спорт мусобақалари ёпиқ эшиклар ортида ўтказилиши, 23 мартдан 1 апрелгача бўлиб ўтиши режалаштирилган 2020 йилги Саудия Олимпия ўйинлари эса кейинги билдиришга қадар тўхтатиб турилиши эълон қилинди.

Таълим

8 март куни Саудия Арабистони Таълим вазирлиги вируснинг тарқалишини назорат қилиш учун мамлакатдаги барча ўқув муассасалари, шу жумладан, давлат ва хусусий мактаблар, касб-ҳунар таълими муассасалари ёпилишини эълон қилди.

Кўнгилочар масканлар ва тадбирлар

14 март куни Саудия Муниципал ва қишлоқ ишлари вазирлиги барча савдо марказлари, истироҳат боғлари ва кўнгилочар ҳудудлар, 15 мартда эса ресторанлар, қаҳвахоналар ёпилишини эълон қилди. Бундан ташқари, вазирлик ижтимоий тадбирлар, шу жумладан, дафн маросимлари ва тўй ўтказиш тақиқланишини билдирди.

Иқтисодиёт

2020 йил 10 майда Саудия Арабистони 1 июндан эътиборан минг риёл – ойлик яшаш учун тўланадиган нафақа тўхтатилиши, 1 июлдан бошлаб эса қўшимча қиймат солиғи 5 фоиздан 15 фоизгача оширилишини эълон қилди.

Подшоҳлик харажатларни 100 миллиард риёлга (26,6 млрд АҚШ доллари) камайтирди. 2020 йилнинг биринчи чорагида 9 млрд АҚШ доллари миқдоридаги бюджет тақчиллиги ҳам нефть нархи пасайиши ва пандемиянинг иқтисодий оқибатлари туфайли юз берди.

Беморларни даволашда тиббий роботдан фойдаланилмоқда

Саудия Арабистони шифохоналари коронавирус билан касалланган беморларни даволаш учун сунъий интеллектни амалда қўлламоқда. Ар-Риёд ва Жидда шаҳарларининг тиббий мажмуаларида беморларни текширадиган ва уларга ташхис қўядиган, Хитойда ишлаб чиқарилган тиббий роботлардан фойдаланилмоқда.

Қурилма зарур асбоб-ускуналарга эга. Бу эса шифокорларга Covid-19 ҳолатларига ташхис қўйиш, хавфсиз масофада ишлаш, рентген натижаларини олиш ва смартфон иловаси ёрдамида беморнинг тиббий тарихидаги ёзувларни текшириш имконини беради. Айни пайтда тиббий робот шифокорлар ва беморлар орасидаги алоқаларни 95 фоизга камайтиришга хизмат қилади.

Кўпроқ янгиликлар