Давлат дастурлари амалга оширилиши Вазирлар Маҳкамаси ва Олий Мажлис томонидан мониторинг қилинади

Ўзбекистон 08:48 / 22.05.2020 1098

Ҳужжат Президентнинг 28.01.2019 йилдаги «Мамлакатни ижтимоий-иқтисодий ривожлантиришнинг стратегик вазифалари амалга оширилиши самарадорлиги учун Ўзбекистон Республикаси Вазирлар Маҳкамасининг масъулиятини оширишга доир биринчи навбатдаги чора-тадбирлар тўғрисида»ги ПФ-5644-сон Фармони ҳамда 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифаларнинг бажарилишини таъминлаш мақсадида ишлаб чиқилган.
 
Norma’нинг ёзишича, вазирликлар ва идоралар раҳбарларига Давлат дастури бажарилишининг бориши юзасидан ҳисоботларни шакллантириш учун зарур маълумотларнинг ўз вақтида ва сифатли тайёрланиши учун шахсий масъулият юкланади.
 
Ҳар йили Давлат дастури тасдиқланганидан кейин унинг ҳар бир банди Вазирлар Маҳкамасининг тегишли таркибий бўлинмаларига бириктирилади. Давлат дастури ижросини таҳлил қилиш ва мониторинг олиб бориш учун идоралараро гуруҳлар ташкил этилади.
 
Давлат дастури ижроси учун масъуллар ва ҳамижрочилар томонидан ҳисоботлар тақдим этилади, уларни таҳлил қилиш ва мониторинг натижалари низомда белгиланган даврларда ҳар бир ой бўйича жамлаб борилади. Ҳисоботлар Вазирлар Маҳкамасида ҳуқуқий экспертизадан ўтказилади.
 
Ҳисоботларни тайёрлашда қабул қилинган НҲҲ, эришилган энг муҳим кўрсаткичлар, хусусан, жалб этилган инвестициялар ҳажми, яратилган иш ўринлари сони, аҳолининг турмуш шароитларини яхшилаш, жамоатчилик иштироки, давлат дастури ижросининг ҳудудларни комплекс ривожлантиришга таъсири эътиборга олинади.
 
Тайёрланган ҳисоботлар Олий Мажлис палаталарида муҳокама қилинади. Давлат дастури бажарилиши юзасидан мониторинг ўтказиш, таҳлил қилиш, Олий Мажлисга тақдим этиш схемаси Низомга иловада келтирилган.
 
Ҳужжат 19.05.2020 йилдан кучга кирди.

Кўпроқ янгиликлар