Европадаги агентликлар коронавирус сабабли самолётлардаги йўловчилар сонини камайтиришни тавсия қилди

Жаҳон 16:50 / 21.05.2020 1816

Мажбурий ниқоб тақиш, масофа сақлаш ва самолётлардаги йўловчилар сонини камайтириш, дезинфекция – Европа авиацион хавфсизлик агентлиги (EASA) ва Европа касалликлар профилактикаси ва назорат маркази (ECDC) коронавирус пандемияси даврида парвоз қиладиган лайнерлар учун ана шундай тавсияларни берди. Бу ҳақда Le Soir газетаси хабар бермоқда.

Олти ёшгача бўлган болалардан ташқари барча йўловчи ва хизматчиларга ниқоб тақиш тавсия этилган. Бундан ташқари, ниқоблар ҳар тўрт соатда алмаштирилиши, йўловчилар парвоз вақти учун етарлича миқдорда ниқобларга эга бўлиши лозим.

Парвознинг барча босқичларида одамлар орасида 1,5 метр ижтимоий масофа сақлаш тавсия қилинмоқда. Бунинг учун ҳар бир ўриндиқдан кейингисини ёки ҳар иккинчи қатордаги ўриндиқларни бўш қолдириш таклиф этилган.

Агарда бундай масофаланишнинг имконияти бўлмаса, "йўловчи ва экипаж аъзолари мунтазам равишда бошқа ҳимоя чораларини кўриши керак", дейилади агентликларнинг қўшма тавсияномасида.

Le Soir газетасининг қайд этишича, 290та авиакомпанияни бирлаштирган Халқаро ҳаво транспорти ассоциацияси бундай масофаланиш чораларига қарши чиқиб, йўловчилар сонининг камайтирилиши ҳаво кемаларининг зарарга ишлашига ва чипталар нархининг сезиларли даражада кўтарилишига олиб келишини билдирган.

Кўпроқ янгиликлар