Туркия Ўзбекистонга 50та сунъий нафас олиш ускунасини беғараз тақдим этди

Ўзбекистон 16:32 / 21.05.2020 4627

Халқаро миқёсдаги пандемия шароитида Ўзбекистон ва Туркия ўртасидаги гуманитар ҳамкорлик доирасида яна бир муҳим натижага эришилди. Туркия томони яқиндагина мамлакат мутахассислари томонидан ишлаб чиқарилиши йўл қўйилган ва коронавирус билан оғриган беморларни даволашда сув ва ҳаводек зарур бўлган энг замонавий сунъий нафас олиш аппаратларидан 50 донасини Ўзбекистонга беғараз асосда тақдим этишга қарор қилди.

Мазкур қарор яқиндагина қабул қилинганига қарамасдан, Туркиядаги ўзбек дипломатларининг олиб борган тезкор музокаралари ва саъй-ҳаракатлари натижасида гуманитар юкни бир кун ичида расмийлаштириш ва 21 майдаги Истанбул-Тошкент рейси билан Ўзбекистонга юборишга муваффақ бўлинган.

Маълумот учун: Ушбу сунъий нафас ускунаси халқаро пандемия эълон қилиниши биланоқ Arçelik, ASELSAN, Baykar Makine ва Biosys каби турк фирмаларининг 120 дан ортиқ мутахассисларининг изланишлари натижасида ишлаб чиқилган. Лойиҳа бевосита Туркия Соғлиқни сақлаш вазирлиги ва Саноат ва технологиялар вазирлиги ҳамкорлигида қўллаб-қувватланган. Ускуналарни сериявий ишлаб чиқариш “Arçelik” фирмасининг Истанбулдаги фабрикасида яқиндагина йўлга қўйилди.

Қайд этиш керак, сунъий нафас олиш ускуналари COVID-19 билан оғриган ва оғир аҳволдаги беморларни даволашда ҳаётий аҳамият касб этади. 

Кўпроқ янгиликлар