Авиачипталар нархи ва кейинги чартер рейслар — Транспорт вазирлиги мутасаддиси билан суҳбат

Ўзбекистон 20:15 / 14.05.2020 29023

Kun.uz мухбири шу саволларга жавоб олиш мақсадида вазирлик матбуот хизмати раҳбари Наврўз Ашурматов билан онлайн суҳбат ташкил қилди.

— Айни вақтда Россияда бўлиб турган фуқаролар чартер рейслар учун авиачипталарни қаердан ва қай тартибда олиши керак?

— Брифинг давомида 11-24 май кунлари чартер рейслар ташкил қилиниши ҳақида хабар берилганди. Россиядан Ўзбекистонга қайтмоқчи бўлган фуқароларимизнинг мурожаатлари нисбатан кўпроқ. Улар чартер рейслар учун аввало Россиядаги Ўзбекистон элчихоналари ва консуллик идораларига қўнғироқ қилиб ёки ижтимоий тармоқда очилган расмий саҳифаларида рўйхатдан ўтган ҳолда ёзилишлари мумкин. Рўйхатдан ўтгандан сўнг келиб тушган мурожаатлар асосида ҳар бир рейс учун бортга қўйиладиган йўловчилар рўйхати консуллик ва элчихоналар томонидан шакллантирилади. Авиапарвозга 4 соат қолганда чипталарни аэропортлардаги «Ўзбекистон ҳаво йўллари» компанияси кассаларидан сотиб олишлари мумкин.

— Брифингда авичипталарни энг минимал нархларда сотилади, деган эдингиз. Энг кам сумма деганда, қанча маблағ тушунилади? Айрим жойларда авиачипталар нархи кўтарилиб кетаётгани бўйича ҳам гаплар тарқалмоқда. Булар қанчалик ҳақиқатга яқин?

Наврўз Ашурматов

— Чартер рейслар учун сотувга қўйилган чипталар нархи минимал тарифдан юқори бўлмаслиги белгиланган. Ҳар бир йўналиш нуқтаи назаридан кўриб чиқадиган бўлсак, Франкфурт-Тошкент йўналишидаги чартер рейс нархи 400 АҚШ доллари, Москва-Тошкент йўналиши нархи 147 АҚШ доллари, Истанбул-Тошкент йўналиши 285 АҚШ доллари, Санкт-Петербург – Тошкент йўналиши 178 АҚШ доллари, Деҳли-Тошкент йўналиши 224 АҚШ доллари, Ростов-Тошкент йўналиши 160 АҚШ, Қозон-Тошкент йўналиши 148 АҚШ доллари, Лондон-Тошкент йўналиши 440 АҚШ доллари, Новосибирск-Тошкент йўналиши 186 АҚШ доллари, Шаржа-Тошкент йўналиши 221 АҚШ доллари деб белгиланган.

— Агар авиачипталарнинг белгиланган нархи оширилса, фуқаролар қаерга мурожаат қилиши керак?

— Чипталар нархи оширилаётгани бўйича ҳолатлар юз бераётган бўлса, «Ўзбекистон ҳаво йўллари» компаниясининг call-марказига (+99871) 140-02-02 рақамларига қўнғироқ қилиб мурожаат этишлари мумкин. Фуқаролар авиачипта сотиб олишга қурби етмаётганлиги бўйича ҳам кўп мурожаатлар келиб тушмоқда. Агар шундай фуқаролар консуллик ва элчихоналарда чартер рейслар учун рўйхатдан ўтган ва тасдиқланган бўлса, аммо чипта харид қилишга маблағи бўлмаса, Ўзбекистон туриб фуқароларнинг қариндошлари чипта пулини тўлашлари мумкин, яъни чипталарни Тошкентдан сотиб олиш имконияти ҳам бор.

— Моддий жиҳатдан қийналаётган фуқаролар масалалари индивидуал тарзда ўрганиб чиқилиб, ижтимоий ёрдам берилиши мумкинлиги ҳақида айтгандингиз. Демак, бундай турдаги ёрдам ҳам сақланиб қоладими?

— Консуллик ва элчихоналарда рўйхат шакллантирилганлиги ҳақида хабар бердик. Биринчи навбатда рейсларга бемор, ёш болали, ҳомиладор аёллар ва кекса ёшдаги ва бекор қилинган рейсларга чипта харид қилган фуқаролар қўйилиши белгиланган. Ҳақиқатда муҳтож бўлган фуқаролар мурожаат қилса, масала индивидуал тарзда ўрганиб чиқилади. Ижобий ечим топиш кўриб чиқилади.

— Белгиланган чартер рейслар амалга ошириб бўлинганидан кейин ҳам Ўзбекистонга қайтмоқчи бўлганларга қўшимча рейслар ташкил қилинадими? Бу оралиқ муддат узоқ бўлиб кетмайдими?

— 24 майдан кейин чартер рейслар ташкил қилинса, бу ҳақида қўшимча ахборот берилади. Ўзбекистонга қайтмоқчи бўлган фуқароларнинг аксарият қисми Россия шаҳарларидан. Ташқи ишлар вазирлиги томонидан берилган ахборотга кўра, бугун соат 20.45 ҳолатига кўра (суҳбат 13 май куни ёзиб олинган), элчихона ва консулликлар томонидан тузилган онлайн рўйхатга 55 минг нафар фуқаро киритилган. 12 майнинг ўзида 4000 нафардан ортиқ фуқаролар Ўзбекистонга қайтиш учун элчихонага мурожаат қилган. Фуқаролар тўғри тушунишларини хоҳлардик: 55 минг нафар фуқарони бирданига олиб келиш имкони йўқ. Вазиятга қараб қўшимча рейслар ташкил қилинса, бу ҳақида ахборот берилади. Элчихона, консулликлар олдига ёки аэропортларга тўпланиб коронавирусни юқтириб олиш хавфини ошириб юбормасликларини сўраб қолган бўлардик.

Шунингдек, 15 май куни ҳам Тошкент-Куала Лумпур-Сингапур-Тошкент йўналиши бўйича чартер рейслар ташкил қилинади.

Илёс Сафаров суҳбатлашди.

Кўпроқ янгиликлар