Bu haqda Rossiyaning Shimoliy Koreyadagi elchixonasi Facebook’dagi sahifasida ma'lum qildi.
Ta'kidlanishicha, Kim Chen In “1941-1945 yillardagi Ulug‘ Vatan urushidagi G‘alabaning 75 yilligi” medali bilan Shimoliy Koreya hududida halok bo‘lgan va dafn etilgan sobiq ittifoq fuqarolarining xotirasini abadiylashtirishga qo‘shgan hissasi va sobiq ittifoq jangchilari ko‘milgan joylar va ularga o‘rnatilgan yodgorliklar muhofazasida ko‘rsatilgan g‘amxo‘rlik uchun taqdirlangan.
Ta'kidlanishicha, medalni Rossiyaning Shimoliy Koreyadagi elchisi Aleksandr Matsegora Shimoliy Koreya tashqi ishlar vaziri Li Son Gvonga topshirgan.
Kim Chen Inning Rossiyaga ilk tashrifi 2019 yil aprelida bo‘lib o‘tgandi. Tashrif vaqtida Vladimir Putin Kim Chen In bilan Vladivostokda uchrashgan. O‘shanda ikki yetakchi matbuot uchun yopiq rejimda 2 soatdan ko‘proq suhbatlashgan.
Oxirgi kunlarda Kim Chen In omma oldida ko‘rinmay qo‘ygandan keyin uning sog‘lig‘i yomonlashgani va hattoki vafot etgan bo‘lishi mumkinligi haqida mish-mishlar paydo bo‘lgandi. Biroq 1 may kuni uning Sunchxon shahrida o‘g‘itlar ishlab chiqaruvchi zavod ochilishida ishtirok etgani suratlari paydo bo‘lgan. Suratlarda u sog‘lom va quvnoq ko‘rinishda bo‘lgan.