Ўзбекистон 2030 йилги Осиё ўйинлари мезбонлиги учун ариза топширмади

Спорт 23:27 / 04.05.2020 14800

Осиё Олимпия Кенгаши (ООК) хабарига кўра, 2030 йилги XXI Осиё ўйинлари мезбонлиги учун фақат 2та шаҳар ариза топширди. 22 апрель ҳужжат топширишнинг охирги санаси эди ва бу вақтга қадар фақат Доҳа ва Ар-Риёддан ариза келиб тушди.

Қайд қилиш жоизки, Доҳа 2006 йили XV Осиё ўйинларини қабул қилган эди. Саудия Арабистони эса ҳали бу даражадаги нуфузли мусобақани ўтказмаган.

2030 йилги XXI Осиё ўйинлари мезбони ҳақидаги қарор 2020 йил 29 ноябрь куни Хитойнинг Санья шаҳрида ўтказиладиган ООК бош ассамблеясида қабул қилинади.

Қайд қилиш жоиз, 2030 йилги Осиё ўйинлари мезбонлиги учун Ўзбекистоннинг Тошкент ва Самарқанд шаҳарлари ҳам даъвогарлик қилиши режалаштирилган эди.

Бу ҳақда илк марта 2018 йил сентябрь ойида маълум бўлган, президент Шавкат Мирзиёев мамлакат спорти мутасаддилари ва ҳукумат раҳбарлари билан ўтказилган йиғилишда шу тўғрида топшириқ берганди.

Кейинроқ, 2018 йил декабрь ойида Ўзбекистон президенти парламентга мурожаатида ушбу масалага яна тўхталиб ўтди:

«Келгусида ёзги Осиё ўйинларидан бирига мезбонлик қилиш бўйича ҳаракатларни бошлашимиз керак. Албатта, бу катта марра. Лекин биз бу маррага қодир эканлигимизни кўрсатсак, тўғри бўлар эди. Биз шунга муносибмиз десак, бу ҳам тўғри. Бу борада 3 ой муддат ичида тегишли чораларни ишлаб чиқилади», – деди президент.

2019 йил 24 февраль куни ООК президенти Шайх Аҳмад Ал-Фаҳад Ас-Сабоҳ бошчилигида делегация Тошкентга ташриф буюрди. Мартабали меҳмонлар билан икки кун давомида ўтказилган учрашувларда Ўзбекистоннинг 2030 йилги Осиё ўйинлари мезбонлиги учун имкониятлари кўриб чиқилди.

Музокараларда Миллий олимпия қўмитасининг ўша пайтдаги президенти Умид Аҳмаджонов ООК раҳбарига Ўзбекистон 2030 йилги мусобақани қабул қилиш бўйича ариза йўллаганини маълум қилган эди.

«Ўйинларни ўтказиш учун бежизга Тошкент ва Самарқанд шаҳарлари танлангани йўқ. Ҳар икки шаҳарда ҳам сайёҳлик имкониятлари юқори. Асосий спорт турлари Тошкент шаҳрида бўлиб ўтади. Самарқандда эса асосан сув спорти турлари, эшкак эшиш бўйича беллашувлар ташкил этилади», дея режалар ҳақида гапирганди Аҳмаджонов.

2019 йил 14 май куни Ўзбекистонда ёзги Осиё ўйинларини ўтказишни ташкил этиш тўғрисида Ҳукумат қарори қабул қилинди.

Қарорда ёзги Осиё ўйинларини ўтказишни ташкил этиш учун муносиб инфратузилмани яратишга мўлжалланган чора-тадбирлар дастури ҳамда уни амалга ошириш бўйича ишчи гуруҳи таркиби тасдиқланиб, Миллий олимпия қўмитаси ҳузурида халқаро нуфузли мусобақаларни юқори савияда ўтказиш бўйича жамғарма ташкил этилиши, Тошкент ва Самарқанд шаҳарларида Олимпия шаҳарчалари қурилиши белгилаб берилган эди.

Ҳукумат қарори қабул қилинган куннинг эртасига Умид Аҳмаджонов МОҚ президенти лавозимини тарк этди.

Маълумот ўрнида, Осиё ўйинлари илк маротаба 1951 йил Ҳиндистоннинг Деҳли шаҳрида ўтказилган. Навбатдаги 2022 йилги Осиё ўйинлари Хитойнинг Ханчжоу, 2026 йилги Осиё ўйинлари эса Япониянинг Нагоя шаҳрида ўтказилиши лозим.

Кўпроқ янгиликлар