ОТБ иштирокида «Қаттиқ маиший чиқиндиларни барқарор бошқариш» лойиҳаси амалга оширилади

Иқтисодиёт 09:49 / 04.05.2020 1048

Президентнинг “Осиё тараққиёт банки иштирокидаги “Қаттиқ маиший чиқиндиларни барқарор бошқариш” лойиҳасини амалга ошириш чора-тадбирлари тўғрисида”ги қарори лойиҳаси муҳокама учун жойлаштирилди.

Қайд этилишича, қуйидагилар:

2020 йил 17 апрелда Осиё тараққиёт банки (ОТБ) Директорлар кенгаши томонидан “Қаттиқ маиший чиқиндиларни барқарор бошқариш” лойиҳасини молиялаштириш учун 5 йиллик имтиёзли даврни ўз ичига олган, 25 йил муддатга, 60,0 млн АҚШ доллари миқдорида Ўзбекистон Республикасига қарз беришни маъқуллаган;

лойиҳанинг умумий қиймати 112 млн АҚШ доллари эквивалентини, улардан 52 млн АҚШ доллари, шу жумладан солиқ ва божхона тўловлари бўйича имтиёзлар бериш шаклида – 44,01 млн АҚШ доллари Ўзбекистон Республикасининг улушини ташкил этади;

лойиҳани амалга ошириш даври 5 йил этиб белгиланган (2020-2024 йиллар).

Белгиланишича:

лойиҳани ўз вақтида амалга ошириш, шунингдек, ОТБнинг қарзидан мақсадли ва самарали фойдаланиш юзасидан ижро этувчи орган этиб Ўзбекистон Республикаси Экология ва атроф муҳитни муҳофаза қилиш давлат қўмитаси ҳисобланади;

лойиҳани амалга ошириш даврида ОТБнинг қарзи бўйича фоизлар ва комиссияларни тўлаш ОТБнинг қарзи ҳисобидан амалга оширилади;

2025 йилдан бошлаб ОТБнинг қарзини узиш ва фоизларни тўлаш билан боғлиқ харажатлар Қорақалпоғистон Республикаси ва вилоятлар “Тоза ҳудуд” ДУКларининг ўз маблағлари ҳисобидан амалга оширилади.

Давлат экология қўмитаси раиси зиммасига лойиҳа доирасидаги тадбирларни самарали амалга ошириш учун зарур шарт-шароитларни таъминлаш, ОТБ ва Ўзбекистон Республикаси қонун ҳужжатлари талабларига мувофиқ зарур ҳисобот ҳамда ҳужжатларни тайёрлаш ва тақдим этишни ўз вақтида ташкиллаштириш юзасидан шахсий жавобгарлик юкланади.

Президентнинг 2018 йил 16 июлдаги ПҚ-3857-сон қарори билан тасдиқланган “Халқаро молия институтлари ва хорижий ҳукумат молия ташкилотлари иштирокидаги лойиҳаларни тайёрлаш ва амалга ошириш тартиби тўғрисидаги низом”нинг 42-бандига мувофиқ Давлат экология қўмитаси ҳузурида Лойиҳаларни бошқариш гуруҳи ташкил этилади.

Ўзбекистон Республикаси молия вазирига Ўзбекистон Республикаси номидан ОТБ билан қарз битимини ва Давлат экология қўмитаси билан ОТБ қарзини қайта кредитлаш тўғрисидаги битимни имзолаш ваколати берилади.

Ўзбекистон Республикаси Адлия вазирлиги:

Ўзбекистон Республикаси ва ОТБ ўртасидаги қарз битими;

лойиҳа доирасида ОТБ ҳамда Давлат экология қўмитаси билан ОТБнинг қарз маблағларини қайта кредитлаш битимлари ва уларга киритиладиган ўзгартиришлар юзасидан ўрнатилган тартибда юридик хулосалар беради.

Лойиҳани амалга ошириш доирасида:

ОТБ қарзи ҳисобидан ўрнатилган тартибда тасдиқланадиган рўйхатлар бўйича Ўзбекистон Республикаси ҳудудида харид қилинадиган ва олиб кириладиган товарлар (ишлар, хизматлар) ва транспорт воситалари қўшилган қиймат солиғи, автотранспорт йиғимлари ва божхона тўловларидан (божхона расмийлаштируви учун йиғимлардан ташқари);

юридик шахслар – Ўзбекистон Республикаси норезидентлари – юридик шахслар даромади солиғидан;

жисмоний шахслар – Ўзбекистон Республикаси норезидентлари – жисмоний шахслар даромади солиғидан озод қилинади.

Белгиланишича:

мазкур бандга мувофиқ тақдим этилган имтиёзларнинг амал қилиши лойиҳа доирасида Давлат экология қўмитасининг бюджетдан ташқари маблағлари ҳисобидан харид қилинадиган товарлар (ишлар, хизматлар)га ҳам жорий этилади;

мазкур бандда кўрсатилган имтиёзларни тақдим этиш натижасида бўшаган маблағлар миқдори Ўзбекистон Республикасининг лойиҳани амалга оширишдаги улуши деб ҳисобланади.

Кўпроқ янгиликлар