Jismoniy tarbiya va sport vazirligi tomonidan yuborilgan homiylik ko‘magi Guliston olimpiya zaxiralari maktab-internati hamda Sirdaryo viloyati bolalar-o‘smirlar futbol akademiyasi yotoqxonalariga vaqtinchalik evakuatsiya qilingan yurtdoshlarimizga yetkazib berildi.

Ular tomonidan to‘plangan buyumlar, oziq-ovqat mahsulotlari, issiq kiyim-kechaklar, gigiyenik vositalar, kir yuvish mashinalari, sport kiyimlari va jihozlaridan iborat “Saxovat karvoni” kecha, 2 may kuni Sirdaryo viloyatiga yetkazib berildi.

Jismoniy tarbiya va sport vazirligi tomonidan yuborilgan homiylik ko‘magi Guliston olimpiya zaxiralari maktab-internati hamda Sirdaryo viloyati bolalar-o‘smirlar futbol akademiyasi (Futbol mahorati maktabi) yotoqxonalariga vaqtinchalik evakuatsiya qilingan yurtdoshlarimizga yetkazib berildi.

Shuningdek, bu yerga joylashtirilgan fojiadan jabr chekkan yurtdoshlarimizning bo‘sh vaqtlarini mazmunli tashkil etish hamda ularni ruhiy qo‘llab-quvvatlash maqsadida stol tennisi, shaxmat-shashka sport turlari bo‘yicha bir qator musobaqalar ham tashkil etilmoqda.

Bugun, 3 may kuni ham Jismoniy tarbiya va sport vazirligining “Saxovat” aksiyasi doirasida Toshkent shahrida yig‘ilgan ro‘zg‘or buyumlari, issiq kiyim-kechaklar, oziq-ovqat mahsulotlari, maktab o‘quvchilari uchun badiiy kitoblar hamda o‘quv qurollari va boshqa turdagi mahsulotlardan tashkil topgan ikkinchi “Saxovat karvoni” Sirdaryo viloyatiga jo‘natildi.

Eslatib o‘tamiz, Sirdaryo viloyatidagi Sardoba suv omborida to‘g‘oni 1 may tongida buzilib, suv toshib chiqqan edi. 3 may holatiga ko‘ra qutqaruvchilar tomonidan 300dan oshiq kishi toshqin oqibatlaridan qutqarilgan.

Avariya oqibatida kelib chiqqan suv toshqinlaridan so‘ng 70 mingga yaqin aholi evakuatsiya qilingan, kamida 56 nafar fuqaro turli tan jarohatlari bilan kasalxonalarga yotqizilgan.