«Барселона» клуб стадионининг номини сотувга қўйди. Тушган пул коронавирусга қарши курашда ишлатилади

Спорт 22:05 / 21.04.2020 4919

Бу ҳақда клуб расмий сайтида эълон қилинган.

Манбада айтилишича, 2020/21 йилги мавсум учун «Барселона» клубига тегишли ва «Камп Ноу» деб аталадиган афсонавий стадион номи ҳомийлик шартномаси асосида сотилади. Ундан тушадиган пул эса Испания ва дунёда коронавирусга қарши кураш учун ишлатилади.

Клуб тарихида ҳеч қачон стадион номи ҳомийлик асосида сотилмаган. 1957 йилда қурилган стадион барпо этилганидан буён «Камп Ноу» деб аталади. Бу каталончада «янги майдон» деган маънони англатади. Стадион ўз бағрига 99 354 мухлисни сиғдира олади.

Шу ўринда бу савдодан қанча пул тушиши мумкин деган савол туғилади. Европада стадионларнинг номини ҳомийлик шартномаси асосида сотиш янгилик эмас. Масалан, «Арсенал», «Манчестер Сити», «Бавария» каби клублар стадионлари номини ҳомийлик асосида сотган. Бир неча йил аввал Fly Emirates компанияси Мадриднинг «Реал» клуби стадиони номини бутунлай сотиб олиш учун 300 миллион евро таклиф қилганди. Аммо Мадрид суперклуби таклифни рад этиб, афсонавий футболчиси Сантьяго Бернабеу шарафига аталган стадион номини ўзгартирмаслигини маълум қилганди.

«Барселона» стадионининг бир йиллик номланишини сотишдан тахминан 25-30 миллион евро ишлаши мумкин. Агар бирор хайрия ташкилоти «Камп Ноу» номини сотиб олиш орқали ўз мавқейини мустаҳкамлашни хоҳласа, сумма каттароқ бўлиши ҳам мумкин.

Маълумот учун, Испанияда коронавирус юқтирганлар сони 200 мингдан ошиб кетди. Касаллик мамлакатда 21 мингдан кўпроқ инсоннинг ўлимига сабаб бўлди.

Кўпроқ янгиликлар