Йирик миқдордаги жарима ва қамоқ. Германияда қандай карантин чоралари жорий этилган?

Жаҳон 20:19 / 06.04.2020 20340

Бавариянинг Ландсхут шаҳри полицияси ижтимоий мулоқот қатъий чекланишига қармасдан дўстлари билан пиво ичиб ўтирган 27 ёшли шахсни учинчи марта ушлагач, полициячиларнинг тоқати тоқ бўлди ва иш судга оширилди. Бунга қадар у билан бир неча марта тушунтириш ишлари олиб борилган, карантин қоидаларини бузгани учун жарима ҳам тўлаганди. Бундан ҳеч қандай натижа чиқмади ва қоидабузар бир ҳафтага қамоққа ташланди.

Қонун бўйича жарима

Бу Германиядаги ана шундай биринчи ҳолат, аммо бу карантин қоидаларига риоя қилмайдиганлар қандай кескин жазоланишини кўрсатиб турибди. Юқумли касалликлардан ҳимояланиш тўғрисидаги федерал қонун юридик асос бўлиб хизмат қилса-да, жарималар ва жазо шакллари мамлакатнинг турли федерал ерларида турлича. Қонунда 25 минг еврогача жарима ёки қоидабузар кимгадир касаллик юқтирган бўлса, озодликдан маҳрум қилиш кўзда тутилган.

Энг либерал жарималар Бремен ва Баден-Вюртембергда: агарда бир хонадонда яшамайдиган иккидан ортиқ киши (улар ҳатто бир оила аъзолари бўлса ҳам) кўчада, дўконда, жамоат жойларида бирга юрса, уларнинг ҳар бирига юз евродан минг еврогача жарима солиниши мумкин. Баварияда арзирли сабабларсиз уйидан кўчага чиққанлар учун энг кам жарима миқдори 150 евро. Тўғри, бу ерда тоза ҳавода сайр қилиш ҳам арзирли сабаб ҳисобланади, аммо бир неча киши бўлиб шашлик пишириш эмас. Агарда хиёбонда кимгадир бир ярим метрдан яқин масофада ўтирсангиз ҳам шунча жарима тўлашингизга тўғри келади.

Шимолий Рейн - Вестфалия федерал ерида (агарда бир оилада яшамайдиган иккидан ортиқ киши тўпланса) жарима - 200 евро. Агар бу биринчи марта бўлса. қоидабузарлик иккинчи марта такрорланса, жарима икки бараварга ошади. Рейнланд-Пфальцда ҳам ана шундай қоида амал қилади.

Коронавируснинг хавфлилиги ташвишлантирмаяпти

Қайд этиш жоиз, бу жазолар жисмоний шахслар учун. Қаҳвахона, ресторан, бар ва сартарошхоналар кескинроқ жазоланади. Агарда улар ишлайдиган бўлса, уларнинг эгалари ўзлари ва ҳар бир мижоз учун икки ярим мингдан беш минг еврогача тўлашига тўғри келади.

Биргина Берлинда кейинги икки ҳафтада барлар, қаҳвахоналар, чилимхоналар, букмекерлик конторалари томонидан карантин режимини бузиш билан боғлиқ 830та ҳолат қайд этилди. Уларнинг барчаси полиция томонидан ёпилди.

Чилим чекиш қанчага тушади?

Германияда таниқли шахслар орасида энг катта жаримани "Шальке" ярим ҳимоячиси Амин Арит тўлади. Уйда ўтираверишдан зада бўлган 22 ёшли футболчи дўстлари билан чилим чекмоқчи бўлди. Эссен шаҳридаги чилимхона эгаси тунда улар учун чилимхонасини очди. Тунги соат иккида чилимхонани полиция босди.

Барча учун, шунингдек, чилимхонани очтиргани учун жаримани Арит тўлади. Хабар қилинишича, у жами 70 минг еврога яқин жарима тўлаган. Бундан ташқари, "Шальке" раҳбарияти унга 30 минг евро жарима тўлади. Маблағ оғир аҳволга тушиб қолган футбол мухлисларига ёрдам бериш учун ташкил этилган жамғарма ҳисобига ўтказилди.

Энг ғаройиб ҳодиса эса Мюльроз шаҳрида яшовчи аёл билан юз берди. Унда коронавирус аниқланган ва шу боис икки ҳафталик уй карантинида ўтириши белгиланганди. Аёл тақиққа қарамасдан кечаси машинасида "шунчаки айлангани" чиқади ва автоҳалокатга учрайди. Полициячилар воқеа жойига етиб келганида у коронавирусга чалинганини айтади. Полиция ходимлари баённома тузишдан олдин махсус ҳимоя либослари кийишларига тўғри келади. "Шунчаки айлангани" чиққан аёл 25 минг еврогача жарима тўлаши мумкин.

Кўпроқ янгиликлар