Жаҳон соғлиқни сақлаш ташкилоти ва ЮНИСEФ коронавирус пандемиясига қарши курашда ҳамкорлик қилади

Жаҳон 19:40 / 06.04.2020 2574

Мазкур ҳамкорлик БМТ ва Швейцариянинг Swiss Philanthropy Foundation жамғармаси кўмагида асос солинган ва COVID-19ни енгиш учун бирдамлик жамғармаси доирасида амалга оширилади.    

COVID-19га қарши бирдамлик жамғармаси ЖССнинг стратегик тайёргарлик ва жавоб чоралари режаси асосида амалга ошириладиган глобал чора-тадбирларга ёрдам бериш мақсадида тузилган. Ушбу келишув доирасида, жамғарманинг 127 миллион доллардан ортиқ бўлган умумий маблағидан биринчи қисми ЮНИСEФнинг бутун дунёдаги ҳимояга энг муҳтож болалар ва маҳаллий жамоалар билан ишлашга қаратилган фаолиятини молиялаштиришга йўналтирилади.

«Ушбу жамғарма маблағлари COVID-19нинг олдини олиш, аниқлаш ва даволаш бўйича маҳаллий ҳамжамиятлар ва тиббиёт ходимларининг билим ва кўникмаларини ошириш ҳамда зарур асбоб-анжомлар билан таъминлаш учун сарфланади. Бу мамлакатлар учун соғлиқни сақлаш имкониятларини кенгайтириш ва COVID -19нинг, айниқса аёллар, болалар ва заиф ижтимоий гуруҳларга нисбатан ижтимоий таъсирини камайтиришга имкон беради. Бундан ташқари, саъй-ҳаракатлар профилактика вакциналарини ва самарали даволаш усулларини ишлаб чиқиш борасидаги тадқиқотларни жадаллаштиради», дейилади юқоридаги ташкилотларнинг қўшма баёнотида.

COVID-19 га қарши бирдамлик фонди ЖССТнинг сўровига биноан Бирлашган Миллатлар Ташкилоти ва Швейцариянинг Swiss Philanthropy Foundation жамғармаси томонидан ташкил этилган ва уч ҳафта олдин ўз фаолиятини бошлаган. Бу жисмоний шахслар ва ташкилотлар учун ЖССТнинг глобал пандемияга қарши курашдаги ҳаракатларига бевосита ҳисса қўшишнинг ягона имкониятидир. Бугунги кунга келиб, жамғарма дунё бўйлаб 219 мингдан ортиқ жисмоний шахслар, шунингдек 90 дан ортиқ халқаро компания ва ташкилотлар томонидан тақдим этилган 127 миллион долларга тенг маблағ йиғди.

Кўпроқ янгиликлар